Read Pennsylvania German Psalm 10 Bible Online

Psalm 10 - Pennsylvania German bible

Psalm 10

¹Favass shtaysht du veit vekk, oh HAH? Favass fashtekkelsht du dich an di zeit funn druvvel?

²Di gottlohsa sinn grohs-feelich un gayn di oahma nohch; loss si kfanga sei in iahra aykni shkeema.

³Di gottlohsa braekka veyyich em evil es si im sinn henn; si saykna da greedich mann un drayya sich vekk fumm HAH.

⁴Da gottlohs in sei shtolsheit sucht nett fa een; awl sei gedanka sinn, “Es hott kenn Gott.”

⁵Sei vayya drayya immah goot aus; eah is grohs-feelich un dei gericht is veit vekk funn vass eah fashtayt; eah macht shpott funn sei feinda.

⁶Eah sawkt zu sich selvaht, “Nix shlechtes kumd zu miah. Ich zayl mich immah froiya un kenn druvvel havva.”

⁷Sei maul is foll mitt fluch vadda, leeya un en gedroi; druvvel un evil sinn unnich sei zung.

⁸Eah hokt fashtekkeld nayksht an di shtett; in seim fashtekkelda blatz macht eah di unshuldicha doht; in seim shlicht vatsht eah fa selli es sich nett helfa kenna.

⁹Eah fashtekkeld sich vi en layb am voahra; eah voaht datt fa selli fanga es sich nett helfa kenna. Eah fangd si un shlayft si fatt in sei net.

¹⁰Eah bikt sich un lost sich nunnah, un deich sei gvald falla selli es sich nett helfa kenna.

¹¹Da gottlohs mann sawkt zu sich selvaht, “Gott hott's fagessa; eah dekt sei ksicht zu un zayld's nee nett sayna.”

¹²Shtay uf, oh HAH! Hayb dei hand uf, oh Gott. Fagess selli nett es sich nett helfa kenna.

¹³Favass dutt da gottlohs sich vekk drayya funn Gott? Favass sawkt eah zu sich selvaht, “Eah shtrohft mich nett”?

¹⁴Avvah du dusht's sayna; du nemsht's acht vann's druvvel un dreebsawl hott, so es du's in dei hand nemma kansht. Sellah es sich nett helfa kann gebt sich ivvah zu diah; du bisht en helfah zu selli unni eldra.

¹⁵Fabrech da oahm fumm gottlohsa un evila mann. Such awl sei ungettlichkeit raus, biss kens may kfunna sei kann.

¹⁶Da HAH is Kaynich fa'immah un immah; di heida zayla aus seim land shteahva.

¹⁷Du heahsht da falanga funn di daymeedicha, oh HAH, du machsht si shteik im hatz un heichsht si oh.

¹⁸Du dusht recht zu kinnah unni eldra un di nunnah-gedreddana, so es da mensh funn di eaht leit nimmi nunnah dredda kann.