Read Pennsylvania German Psalm 102 Bible Online

Psalm 102 - Pennsylvania German bible

Psalm 102

¹En gebayt funn aynah am leida, vo eah oahm un shvach voah un hott sei geglawk ausgleaht zumm HAH. Heich mei gebayt ab, oh HAH, vann ich naus roof fa hilf.

²Fashtekkel dei ksicht nett funn miah, an di zeit funn mei noht. Dray dei oah zu miah, un gebb miah kshvind andvat vann ich roof.

³Mei dawwa sinn am fagay vi shmohk, un mei gnocha am fabrenna vi im feiyah.

⁴Mei hatz is nunnah kshlauwa un fadatt vi graws, so es ich fagess mei broht essa.

⁵Deich mei laut yammahres binn ich yusht may haut un gnocha.

⁶Ich binn vi en fokkel in di vildahnis, vi en owl in en leahrah, dohdah blatz.

⁷Ich lei vakkah; ich binn vi en fokkel laynich uf em dach.

⁸Mei feinda zadda mich da gans dawk lang, un selli es mich fashpodda yoosa mei nohma fa en fluch.

⁹Ich ess esh vi broht, un awwa-vassah is in mei drinkes.

¹⁰Dess is deich dei grohsah zann, fa du hosht mich uf kohva un vekk kshmissa.

¹¹Mei dawwa sinn vi da ohvet shadda, un ich fadatt vi graws.

¹²Avvah du, oh HAH, hoksht uf em kaynich-shtool fa'immah; dei nohma bleibt ayvichlich.

¹³Du zaylsht uf shtay un di shtatt Zion davvahra; es is zeit es du gnaydich bisht zu iahra, di zeit is do.

¹⁴Dei gnechta henn en grohsi leevi fa di shtatt iahra shtay, un davvahra iahra shtawb.

¹⁵Di heida zayla em HAH sei nohma firchta, un awl di kaynicha funn di eaht dei hallichkeit.

¹⁶Fa da HAH zayld Zion viddah ufbauwa, un zayld sich veisa in sei hallichkeit.

¹⁷Eah heicht di gebaydah ab funn di falossana; eah fa'acht iahra gebayt nett.

¹⁸Dess soll kshrivva sei fa selli es nohch kumma, so es selli es geboahra sei zayla, da HAH lohva sella.

¹⁹Da HAH hott runnah gegukt funn seim heilicha-blatz drovva in di hay, fumm himmel hott eah di eaht gegukt.

²⁰Eah hott's geyammah keaht funn di kfangana, un hott selli lohs gedrayt es doht gmacht sei henn sella.

²¹Dess voah so es sei nohma fakindicht vatt in Zion, un eah glohbt vatt in Jerusalem,

²²vann di leit un kaynich-reicha moll zammah kumma, fa da HAH deena.

²³Eah hott mei graft funn miah gnumma, diveil es ich noch yung binn; eah hott mei dawwa fakatzt.

²⁴Ich habb ksawt, “Mei Gott, nemm mich nett vekk in di mitt funn mei dawwa; dei yoahra bleiva fa'immah un immah.

²⁵Am ohfang hosht du di foundation glaykt fa di eaht, un di himla sinn di eahvet funn dei hend.

²⁶Si zayla awl fagay, avvah du bleibsht, si zayla awl ausveahra vi glaydah; vi glaydah dusht du si aus, un no vadda si vekk kshmissa.

²⁷Avvah du bleibsht vi du bisht un dei yoahra zayla nee nett enda.

²⁸Di kinnah funn dei gnechta zayla bleiva, un iahra nohch-kummashaft vatt ufgebaut fannich diah.”