Read Pennsylvania German Psalm 103 Bible Online

Psalm 103 - Pennsylvania German bible

Psalm 103

¹Fumm Dawfit. Lohb da HAH, oh mei sayl, un alles es in miah is; lohb sei heilichah nohma.

²Lohb da HAH, oh mei sayl, un fagess nett vass goodes es eah diah gedu hott.

³Eah fagebt diah awl dei sinda, un hayld awl dei grankeda.

⁴Eah shteld dei layva frei fumm grawb, un krohnd dich mitt gnawt un bamhatzichkeit.

⁵Eah fild dei layva mitt goodi sacha, un du vatsht viddah yung vi en awdlah.

⁶Da HAH shaft gerechtichkeit, un macht alles recht fa selli es nunnah gedredda sinn.

⁷Eah hott sei vayya vissa glost zumm Mosi un sei kshefta zu di Kinnah-Israel.

⁸Da HAH is bamhatzich un gnaydich; eah vatt nett kshvind bays, un hott grohsi leevi.

⁹Eah hald nett oh pshuldicha, un sei zann bleibt nett fa'immah.

¹⁰Eah shtrohft uns nett noch di shuld funn unsah sinda, un betzawld uns nett zrikk in di gleichnis es miah letz doon.

¹¹Fa so hohch es da himmel is ovvich di eaht, so grohs is sei leevi fa selli es een firchta.

¹²So veit es di east is funn di west, so veit dutt eah unsah sinda vekk funn uns.

¹³Vi en faddah bamhatzich is zu sei kinnah, so is da HAH bamhatzich zu selli es een firchta.

¹⁴Fa eah vayst vi miah gmacht sinn, un denkt droh es miah yusht shtawb sinn.

¹⁵Un veyyich em mensh, sei layva is vi graws, eah bleet vi en blumm im feld,

¹⁶no blohst da vind ivvah di blumm, un see is nimmi, un da blatz fagest alles veyyich iahra.

¹⁷Avvah funn ayvichkeit zu ayvichkeit, is em HAH sei shtandhaftichi-leevi uf selli es een firchta, un sei gerechtichkeit mitt iahra kinds-kinnah—

¹⁸mitt selli es sei bund halda, un meinda fa sei gebodda du.

¹⁹Da HAH hott sei kaynich-shtool ufketzt im himmel, un sei Kaynich-Reich roold ivvah alles.

²⁰Lohvet da HAH, diah sei engel, diah mechtichi es sei gebodda ausrichtet, un doond vass sei vatt sawkt.

²¹Lohvet da HAH, awl diah sei himlish folk, diah, sei deenah es sei villa doon.

²²Lohvet da HAH, alles es eah gmacht hott ivvahrawlich in sei Kaynich-Reich. Lohb da HAH, oh mei sayl.