Read Pennsylvania German Psalm 104 Bible Online

Psalm 104 - Pennsylvania German bible

Psalm 104

¹Lohb da HAH, oh mei sayl. Oh HAH, mei Gott, du bisht oahrich grohs ohksenna, du bisht geglayt mitt kaynich-eah un hallichkeit.

²Du deksht dich zu mitt licht es vi mitt glaydah; du shtreksht da himmel aus vi en curtain;

³du hosht di balka funn dei haymet gebaut uf di vassahra ovvich uns; du foahsht uf di volka vi uf en vauwa, un fleeksht uf di flikkel fumm vind;

⁴du machsht da vind dei gebodda-drawwah, un machsht feiyah-flamma dei gnechta sei.

⁵Du hosht di foundations funn di eaht glaykt, un see kann nee nett gmooft sei.

⁶Du hosht da say ivvah see gedu vi en glayt, un's vassah hott di berga zu gedekt.

⁷Vo du di vassahra gezankt hosht, henn si falossa; an di yacht funn deim dimmel, henn si sich vekk gedummeld.

⁸Di vassahra sinn ruff ivvah di berga gloffa, un nunnah in di deicha ganga, an da blatz es du gmacht katt hosht fa si.

⁹Du hosht en blatz gmacht es di vassahra drinn bleiva missa, un si daufa nee nett zrikk kumma un di eaht viddah zu dekka.

¹⁰Du machsht di shpringa lawfa in di deicha, un di revvahra lawfa zvishich di hivla,

¹¹si gevva vassah zu awl di diahra im feld, di vildi aysla drinka sich satt.

¹²Datt nohch doon di fekkel fumm himmel iahra neshtah bauwa, si singa in di nesht funn di baym.

¹³Du vessahsht di berga funn ovva-heah, di eaht is zufridda gmacht mitt di frucht funn dei eahvet.

¹⁴Du machsht's graws vaxa fa's fee, un di blansa es leit acht gevva druff, so es si iahra ess-sach greeya kenna funn di eaht.

¹⁵Du gebsht vei fa em mensh sei hatz froh macha, ayl fa sei ksicht glitzahrich macha, un broht fa sei hatz greftich macha.

¹⁶Di baym fumm HAH sinn goot gvessaht, di cedars funn Lebanon es eah geblanst hott.

¹⁷Datt bauwa di fekkel iahra neshtah, un da stork dutt sei nesht in da fir bohm.

¹⁸Di vilda gays layva in di hohcha berga, un di badgers unnich di felsa.

¹⁹Du hosht da moon gmacht fa's yoah fadayla, un di sunn vayst vann zu unnah gay.

²⁰Du hosht's dunkla un di nacht gmacht, di zeit vann awl di diahra im bush raus kumma.

²¹Di yunga layb roahra diveil es si hunda, un sucha fa iahra ess-sach funn Gott.

²²Vann di sunn ufkumd gayn si zrikk nei, si gayn zrikk un leiya uf deich da dawk.

²³No gayt da mensh naus an sei eahvet, un shaft biss ohvet.

²⁴Oh HAH, vi feel sinn dei verka, in dei veisheit hosht du si awl gmacht. Di eaht is foll mitt dei levendichi sacha.

²⁵Datt is da say, grohs un brayt, datt vo grohs un glenni diahra layva, so feel es ma si nett zayla kann.

²⁶Datt gayn di shiffah zrikk un faddi, un di grohs say-shlang es du gmacht hosht shpeeld drinn.

²⁷Dee doon awl zu diah gukka fa ess-sach, es du eena gebsht an di recht zeit.

²⁸Vann du's gebsht zu eena, dann geddahra si's uf. Vann du dei hand uf machsht, dann vadda si satt mitt goodi sacha.

²⁹Vann du dei ksicht fashtekkelsht, dann feicha si sich. Vann du iahra ohften vekk nemsht, dann gayn si doht un fagayn, un drayya zrikk zu shtawb.

³⁰Vann du eena dei ohften gebsht, no sinn si kshaffa, un du gebsht nei layva zu di eaht.

³¹Di hallichkeit fumm HAH bleibt fa'immah; loss da HAH sich froiya ivvah sei verka.

³²Eah gukt an di eaht, un si ziddaht, eah raykt di berga oh, un si shmohka.

³³Ich zayl zumm HAH singa mei layva lang, un ich sing lohb zu mei Gott so lang es ich layb.

³⁴Loss mei gedanka veyyich eem kfellich sei zu eem; ich froi mich im HAH.

³⁵Loss di sindah faddich gmacht sei uf di eaht, un loss di gottlohsa nimmi sei. Lohb da HAH, oh mei sayl, Halleluja!