Read Pennsylvania German Psalm 105 Bible Online

Psalm 105 - Pennsylvania German bible

Psalm 105

¹Gevvet dank zumm HAH, un roofet sei nohma oh; fazaylet unnich di heida vass eah gedu hott.

²Singet zu eem, un lohvet een, sawwet veyyich awl sei vundahboahri verka!

³Hallichet sei heilichah nohma; loss di hatza funn selli es da HAH sucha sich froiya.

⁴Suchet da HAH un sei graft, suchet immah sei ksicht.

⁵Denket an di vundahboahra verka es eah gedu hott, an sei zaycha un's richtes funn seim maul,

⁶diah nohch-kummashaft funn sei gnecht, da Abraham, diah kinnah fumm Jakob, sei raus-groofeni.

⁷Eah is da HAH, unsah Gott, sei richtes is in di gans veld.

⁸Eah denkt immah an sei bund, an's vatt es eah gebodda hott zu dausends funn dee es nohch kumma zayla,

⁹sell bund es eah gmacht hott mitt em Abraham, un vass eah fashprocha un kshvoahra hott zumm Isaac.

¹⁰Eah hott's viddah ivvah fashprocha un fesht gmacht zumm Jakob, un zu Israel es en ayvich bund.

¹¹Eah hott ksawt, “Ich gebb eich's land funn Kanaan; es zayld eiyah dayl funn eahbshaft sei.”

¹²Vo si noch vennich voahra un nett feel in nambah, un noch fremd voahra im land,

¹³sinn si funn land zu land gezowwa, un funn ay kaynich-reich zumm anra.

¹⁴Eah hott nimmand glost si nunnah dredda, un fa iahra sayk hott eah kaynicha gezankt.

¹⁵Eah hott ksawt, “Layyet eiyah hend nett uf mei ksalbdi, un doond kenn shawda zu mei brofayda.”

¹⁶Eah hott hungahs-noht in's land kumma gmacht, un hott awl iahra ess-sach vekk gnumma.

¹⁷Eah hott en mann fannich eena heah kshikt, dess voah da Joseph, deah vo fakawft is vadda es en bunds-gnecht.

¹⁸Sei fees voahra in kedda gedu, un en eisichah kallah um sei hals rumm,

¹⁹biss voah kumma is vass eah foahksawt katt hott, un biss em HAH sei vatt gvissa hott es eah recht voah.

²⁰Da kaynich hott vatt kshikt fa een lohs lossa, da roolah funn di leit hott een frei ksetzt.

²¹Eah hott een ivvah-saynah gmacht funn sei haus, un hott een roolah gmacht ivvah awl sei sach,

²²so es eah sei feddahshti gland hott vi eah hott vella, un hott sei eldishti veisheit gland.

²³No is Israel nunnah in Egypta kumma, un da Jakob is en fremdah vadda im land fumm Ham.

²⁴Da HAH hott sei leit oahrich fruchtboah gmacht, un hott si mechtichah gmacht es iahra feinda.

²⁵Eah hott di Egyptah gmacht sei leit hassa, un si henn shlichtich kshaft geyyich sei gnechta.

²⁶Eah hott da Mosi, sei gnecht, kshikt, un da Aaron, deah es eah raus glaysa hott.

²⁷Si henn sei zaycha gedu unnich eena, un sei vundahra im land fumm Ham.

²⁸Eah hott's dunkla kshikt un hott's land dunkel gmacht, un si henn nett geyyich sei vatt kshaft.

²⁹Eah hott iahra vassah in bloot gedrayt, un hott iahra fish gmacht doht gay.

³⁰Iahra land hott kshvoahmd mitt fresh, even in di kammahra funn di kaynicha.

³¹Eah hott kshvetzt, un shvoahms funn mukka sinn kumma, shtech-mukka deich's gans land.

³²Eah hott shlohsa kshikt fa reyyah, un's gviddah voah ivvahrawlich im land.

³³Eah hott iahra drauva-shtekk un feiya-baym kshlauwa, un hott awl di baym im land nunnah gebrocha.

³⁴Eah hott kshvetzt, un di hoi-shrekka un locusts sinn kumma, so feel es ma si nett zayla hott kenna.

³⁵Si henn alles greenes kfressa im land, un henn aw's frucht fumm grund kfressa.

³⁶Eah hott awl di eahsht-geboahrana im land doht gmacht, datt vo's eahshta funn iahra graft drinn voah.

³⁷No hott eah Israel raus gebrocht mitt silvah un gold, un's voahra kenn shvachi leit unnich iahra shtamma.

³⁸Egypta voah froh vo si falossa henn, veil si sich kfeicht henn veyyich di Israeliddah.

³⁹Eah hott en volk anna gedu fa si zu dekka un en feiyah fa helling macha nachts.

⁴⁰Si henn kfrohkt, un eah hott badreeslen gebrocht, un hott si satt gmacht mitt broht fumm himmel.

⁴¹Eah hott da felsa uf gmacht, un vassah is raus gloffa, in drukkani bletz is es gloffa vi en revvah.

⁴²Eah hott an sei heilichi fashprechung gedenkt, un an da Abraham, sei gnecht.

⁴³Eah hott sei leit raus gebrocht mitt frayt, sei raus-groofeni diveil es si am singa voahra.

⁴⁴Eah hott eena di lendah funn di heida gevva, un si henn ivvah-gnumma vass anri kshaft henn difoah,

⁴⁵so es si sei gebodda halda sella, un du vass sei ksetza sawwa. Halleluja!