Read Pennsylvania German Psalm 106 Bible Online

Psalm 106 - Pennsylvania German bible

Psalm 106

¹Lohb sei zumm HAH! Gevvet dank zumm HAH, fa eah is goot, un sei shtandhaftichi-leevi bleibt fa'immah.

²Veah kann di mechticha sacha fazayla es da HAH gedu hott, un sei lohb genunk fakindicha?

³Ksaykend sinn selli es sei gebott halda, un immah doon vass recht is.

⁴Denk an mich, oh HAH, vann du gnaydich bisht zu dei leit, helf miah vann du si frei machsht,

⁵so es ich's gooda sayna kann es du dusht fa dei leit, so es ich froh sei kann veil dei leit sich froiya, un en dayl havva kann mitt di leit funn dei eahbshaft am dich lohva.

⁶Miah henn ksindicht grawt vi unsah foah-feddah henn; miah henn letz gedu un uns gottlohs ohkshikt.

⁷Vo unsah foah-feddah in Egypta voahra, henn si dei vundahra nett fashtanna; Si henn dei grohsi bamhatzichkeit fagessa, un si henn sich kshteibaht am say, am Rohda Say.

⁸Avvah eah hott eena kolfa fa da sayk funn sei nohma, so es eah sei mechtichi graft veisa kann.

⁹Eah hott da Roht Say gezankt, un eah is drukka vadda; eah hott si deich kfiaht es vi deich drukka land.

¹⁰Eah hott eena aus di hand kolfa funn selli es si kast henn, un hott si frei gmacht funn di hand funn iahra feinda.

¹¹Di vassahra henn iahra feinda fasoffa, nett aynah funn eena voah ivvahrich.

¹²No henn si sei vatt geglawbt, un henn sei lohb ksunga.

¹³Avvah si henn glei fagessa vass eah gedu katt hott, si henn nett gvoaht fa sei roht.

¹⁴Si henn glusht in di vildahnis, un henn Gott fasucht im drukka land.

¹⁵So hott eah eena gevva vass si kfrohkt henn difoah, avvah eah hott so feel kshikt biss es eena ayklich voah.

¹⁶Datt in iahra tents in di vildahnis sinn si jealous vadda fumm Mosi, un fumm Aaron, da heilich gnecht fumm HAH.

¹⁷No hott di eaht sich uf gmacht un hott da Dathan kshlukt, si hott da Abiram un sei drubb zu gedekt.

¹⁸En feiyah is aw ausgebrocha unnich iahra drubb, un hott di gottlohsa fabrend.

¹⁹Si henn en kalb gmacht an Horeb, un henn en gegossa gleichnis ohgebayda.

²⁰Si henn di hallichkeit funn iahra Gott fahandeld fa en gleichnis funn en ox es graws frest.

²¹Si henn Gott, iahra Heiland fagessa, deah vo mechtichi sacha gedu katt hott in Egypta,

²²vundahboahri sacha im land fumm Ham, un shreklichi sacha bei em Rohda Say.

²³Vo Gott ksawt hott eah zayld si umbringa, hott da Mosi, em Gott sei raus-groofanah, sich zvishich si un Gott kshteld, un hott Gott sei zann kalda funn si umbringa.

²⁴Si henn's leeblich land vennich gacht, un henn sei vatt nett geglawbt.

²⁵Si henn gegrummeld in iahra tents, un henn nett keicht zumm HAH sei shtimm.

²⁶So hott eah sei hand uf kohva geyyich si, un hott kshvoahra es eah si nunnah shlauwa zayld in di vildahnis,

²⁷es eah iahra nohch-kummashaft unnich di heida falla macht, un si ausnannah shtroit unnich di lendah.

²⁸Si henn sich ohkanka an da Baal-Peor, un henn opfahra gessa es gopfaht voahra zu dohdi abgettah.

²⁹Si henn da HAH fa'eiyaht bei vass si gedu henn, un en heslichi grankheit is ausgebrocha unnich eena.

³⁰Avvah da Pinehas is ufkshtanna un hott di sach gricht, un di grankheit voah kshtobt.

³¹Un sell voah eem gevva es gerechtichkeit, funn sei nohch-kummashaft zu nohch-kummashaft fa'immah.

³²An di shprings funn Meribah henn si da HAH bays gmacht, un deich si is da Mosi in druvvel kumma.

³³Si henn sei hatz so zannich gmacht, es eah vadda ksawt hott unni denka.

³⁴Si henn di heida nett doht gmacht so vi da HAH see gebodda hott fa du.

³⁵Si sinn eiganga mitt di heida, un henn iahra vayya ohgnumma.

³⁶Si henn iahra abgettah gedeend, un dess is en fall vadda zu eena.

³⁷Si henn iahra boova un mayt gopfaht zu baysi geishtah.

³⁸Si henn unshuldich bloot fagossa, es bloot funn iahra boova un mayt. Si henn si gopfaht zu di abgettah funn Kanaan, un's land voah unrein gmacht bei iahra bloot.

³⁹Si henn sich selvaht unrein gmacht bei vass si gedu henn, un henn huahrahrei gedrivva bei iahra verka.

⁴⁰So voah da HAH bays mitt sei leit, un sei eahbshaft voah grausam gmacht zu eem.

⁴¹Eah hott si ivvah-gevva in di hand funn di heida, so es iahra feinda ivvah si groold henn.

⁴²Iahra feinda henn si nunnah gedredda, un si voahra gedaymeedicht unnich iahra hand.

⁴³Eah hott si oft frei gmacht, avvah si henn sich kshteibaht un henn geyyich een kshaft, un si sinn als deefah in sinda ganga.

⁴⁴Avvah doch hott eah acht gnumma funn iahra noht, vo eah si keaht hott een ohroofa.

⁴⁵No hott eah an sei bund gedenkt mitt eena, un deich sei grohsi leevi hott eah nohch glost.

⁴⁶Eah hott gmacht es si gedavvaht voahra bei awl selli es si kfanga kohva henn.

⁴⁷Helf uns, oh HAH, unsah Gott, un bring uns zammah aus di heida. So es miah dei heilichah nohma danka kenna, un froh sei kenna fa dich lohva.

⁴⁸Glohbt sei da HAH, da Gott funn Israel, fa'immah un immah. Loss awl di leit “Amen” sawwa. Halleluja!