Read Pennsylvania German Psalm 107 Bible Online

Psalm 107 - Pennsylvania German bible

Psalm 107

¹Gevvet dank zumm HAH, fa eah is goot; sei shtandhaftichi-leevi is ayvich.

²Loss selli es saylich sinn so sawwa, selli es eah aus noht frei-kshteld hott,

³selli es eah zammah gebrocht hott aus di lendah, funn di east un di west, un funn di natt un di saut.

⁴Dayl sinn rumm gloffa in di vildahnis, un henn kenn vayk finna kenna zu en shtatt es si drinn voona henn kenna.

⁵Si voahra hungahrich un dashtich, un iahra sayl hott hofning faloahra.

⁶No henn si naus groofa zumm HAH in iahra noht, un eah hott eena aus iahra druvvel kolfa.

⁷Eah hott si kfiaht im rechta vayk, zu en shtatt es si drinn voona henn kenna.

⁸Loss si da HAH danka fa sei shtandhaftichi-leevi, fa di vundahboahra sacha es eah dutt zu di mensha-kinnah.

⁹Fa eah macht di dashticha zufridda, un fild di hungahricha mitt goodi sacha.

¹⁰Dayl henn missa in oahrichi dunkli bletz hokka, si voahra kfanga un gebunna mitt kedda,

¹¹veil si geyyich di vadda funn Gott kshaft henn, un henn's roht fumm Alli-Haychshta nunnah gedrayt.

¹²So hott eah iahra hatza nunnah glawda mitt haddi eahvet; si sinn kshtolbaht un's voah nimmand fa helfa.

¹³No henn si naus groofa zumm HAH in iahra noht, un eah hott eena aus iahra angsht kolfa.

¹⁴Eah hott si aus em deef dunkla gebrocht, un hott iahra kedda farissa.

¹⁵Loss si da HAH danka fa sei shtandhaftichi-leevi, fa di vundahboahri sacha es eah dutt zu di mensha-kinnah.

¹⁶Eah brecht eisichi deahra nunnah, un fabrecht di eisicha rikkel.

¹⁷Dayl voahra vi narra un henn missa leida deich iahra ivvah-dreddes un sinda.

¹⁸Awl's ess-sach hott eena gaygeld, un si voahra nayksht am doht.

¹⁹No henn si naus groofa zumm HAH in iahra noht, un eah hott eena aus iahra angsht kolfa.

²⁰Eah hott sei vatt naus kshikt un si kayld, un hott si kalda funn shtauva.

²¹Loss si da HAH danka fa sei shtandhaftichi-leevi, fa di vundahboahra sacha es eah dutt zu di mensha-kinnah.

²²Loss si dank-opfahra opfahra, un sei verka fazayla mitt frayt.

²³Dayl sinn naus uf da say ganga mitt shiffah, un henn sich faseikt uf di grohsa vassahra.

²⁴Si henn em HAH sei eahvet ksenna, un sei vundahboahri verka uf em say.

²⁵Vo eah kshvetzt hott, is en shtoahm uf kumma, un hott di vella ufkshtatt.

²⁶Di shiffah voahra uf kohva geyyich da himmel, un viddah nunnah glost zvishich di vella, biss di leit iahra sayl engshtlich voah deich di kfoah.

²⁷Si sinn kshtolbaht un kshtaekkaht vi ksoffani; un henn sich kenn roht may gvist.

²⁸No henn si naus zumm HAH groofa in iahra noht, un eah hott eena aus iahra angsht kolfa.

²⁹Eah hott da shtoahm gmacht shtill sei, un di vella fumm say henn sich glaykt.

³⁰No voahra si froh vo's shtill is vadda, un eah si an's land gebrocht hott noch iahra falanga.

³¹Loss si da HAH danka fa sei shtandhaftichi-leevi, fa di vundahboahra sacha es eah dutt zu di mensha-kinnah.

³²Loss si een eahra vann di leit zammah kumma, un een lohva unnich di eldishti.

³³Eah hott di revvahra in en drukkani vildahnis gmacht, un vassah-shpringa in dashtichah grund gedrayt.

³⁴Eah hott's fruchtboah land salsich un veesht gmacht, veil selli ungettlich voahra es datt gvoond henn.

³⁵Eah hott di drukka vildahnis zu vassah-lechah gedrayt, un da drukka grund zu vassah-shpringa.

³⁶Eah hott di hungahricha glost datt bleiva, un hott si glost en shtatt bauwa fa drinn voona.

³⁷Si henn feldah eiksayt un vei-goahra geblanst, un henn feel frucht abgnumma.

³⁸Eah hott si ksaykend so es si sich oahrich fameaht henn, un hott iahra fee nett glost vennichah vadda.

³⁹Avvah di leit sinn no viddah vennichah vadda, un sinn niddah gebrocht vadda deich aylend, druvvel un dreebsawl;

⁴⁰eah macht shpott un fa'acht di evvahshta, un macht si rumm lawfa draus im veeshta vo kenn vayk is.

⁴¹Avvah eah haybt di oahma uf aus iahra leides, un fameaht iahra families vi en drubb fee.

⁴²Di ufrichticha sayna dess un sinn froh, avvah's macht awl di ungerechta iahra maul zu.

⁴³Veah-evvah es veisheit hott, loss een dee sacha achta, loss een ivvah em HAH sei shtandhaftichi-leevi denka.