Read Pennsylvania German Psalm 108 Bible Online

Psalm 108 - Pennsylvania German bible

Psalm 108

¹En Psaltah-Leet fumm Dawfit. Mei hatz is shtandhaftich, oh Gott, ich zayl singa un dich lohva. Vekk uf, mei sayl!

²Vekk uf, psaltah un harf! Ich zayl ufvekka eb dawk.

³Ich zayl dich danka, oh HAH, unnich di leit; ich zayl diah lohb singa unnich di heida.

⁴Fa dei shtandhaftichi-leevi langd nuff ovvich da himmel, un dei voahheit biss an di volka.

⁵Hayb dich uf ovvich da himmel, oh Gott, loss dei hallichkeit ivvah di gans eaht sei.

⁶Mitt dei rechtsi hand nemm uns aus di kfoah un gebb miah andvat, so es selli es du leeb hosht frei gmacht vadda.

⁷Gott hott kshvetzt in seim heilichah blatz: “Mitt fraylichkeit zayl ich Sichem fadayla un zayl Tal Sukkoth abmessa.

⁸Gilead is mei, un Manasse is mei, Ephraim is mei greeks-hoot, un Juda is mei zeptah.

⁹Moab is mei vesh-shissel, ivvah Edom shmeis ich mei shoo, ivvah's land Philishtia greish ich laut, veil ich di ivvah-hand habb ivvah's.”

¹⁰Veah fiaht mich zu di shtatt es shteiki mavvahra hott? Veah fiaht mich zu Edom?

¹¹Is es nett dich, oh Gott, es uns falossa hott, un es nimmi naus gayt mitt unsah greeks-gnechta?

¹²Gebb uns hilf geyyich unsah feinda, fa di hilf fumm mensh is nix veaht.

¹³Mitt Gott zayla miah beeda, eah drett uf unsah feinda.