Read Pennsylvania German Psalm 109 Bible Online

Psalm 109 - Pennsylvania German bible

Psalm 109

¹Zumm foah-singah. En Psalm fumm Dawfit. Oh Gott, du es ich preisa du, bleib nett shtill.

²Gottlohsi un falshi mennah henn iahra meilah uf gmacht geyyich mich, si henn geyyich mich kshvetzt mitt zunga es leeya.

³Si henn mich umgringd mitt vadda funn hass, un si shtreida geyyich mich unni uahsach.

⁴Si pshuldicha mich diveil es ich si leeb; avvah ich bayt fa si.

⁵Si betzawla mich zrikk evil fa goodes, un hass fa mei leevi.

⁶Setz en gottlohsah mann ivvah een, loss aynah es pshuldicht an sei rechtsi hand shtay.

⁷Vann si een richta, loss een shuldich kfunna sei, loss sei gebayt gnumma sei es en sind.

⁸Loss sei dawwa vennich sei; loss ebbah shunsht sei blatz nemma.

⁹Loss sei kinnah sei unni en faddah, un sei fraw en vitt-fraw

¹⁰Loss sei kinnah rumm lawfa un bedla; loss si aus iahra fadauvani heisah gyawkt sei.

¹¹Loss da geld-laynah alles nemma es eah hott, loss fremdi sell nemma es eah fadeend hott.

¹²Loss nimmand bamhatzich sei zu eem, un loss nimmand sei kinnah unni faddah davvahra.

¹³Loss sei nohch-kummashaft abkshnidda sei, loss sei kinds-kinnah iahra nohma ausgrivva sei in di zeit vo kumd.

¹⁴Loss es evila funn sei foah-feddah nett fagessa sei bei em HAH, un di sind funn sei muddah nee nett ausgrivva sei.

¹⁵Loss iahra sinda immah fannich em HAH sei, un loss es ohdenkes funn eena gans fagessa sei uf di eaht.

¹⁶Eah hott nee nett droh gedenkt fa bamhatzich sei, avvah eah hott di aylendicha, di oahma un bedreebda fafolkt zumm doht.

¹⁷Eah hott geglicha en fluch ausshprecha; loss en fluch uf een kumma. Eah hott nett geglicha en sayya gevva; loss di sayya veit vekk sei funn eem.

¹⁸Eah hott da fluch gvoahra vi en glayt, loss en fluch in sei leib gay vi vassah, un in sei gnocha vi ayl.

¹⁹Loss es sei zu eem es vi glaydah es um een rumm gvikkeld sinn, vi en belt es immah um een rumm is.

²⁰Loss dess di betzawling fumm HAH sei zu selli es mich pshuldicha, zu selli es evil shvetza geyyich mich.

²¹Avvah du, mei Gott da HAH, helf miah fa di sayk funn deim nohma; deich dei shtandhaftichi-leevi, mach mich frei.

²²Fa ich binn oahm un habb grohsi noht, mei hatz dutt vay in miah.

²³Ich binn am fagay vi en ohvet shadda, ich binn abkshiddeld vi en hoi-shrekk.

²⁴Mei gnee sinn shvach funn fashta, mei leib is mawwa unni fett.

²⁵Ich binn leit iahra shpott, vann si mich sayna, shidla si iahra kobb.

²⁶Helf miah, oh HAH mei Gott, deich dei shtandhaftichi-leevi mach mich frei.

²⁷Loss si vissa es dess dei hand is, es du, oh HAH, dess gedu hosht.

²⁸Loss si flucha, avvah du saykendsht, loss selli es mich pshuldicha sich shemma, avvah loss dei gnecht froh sei.

²⁹Loss selli es mich pshuldicha geglayt sei mitt shohm, loss si iahra shohm veahra vi en vammes.

³⁰Mitt mei maul zayl ich grohs dank gevva zumm HAH, un in di grohs drubb leit zayl ich een lohva.

³¹Fa eah shtayt uf di rechts hand funn sellah es noht hott, un macht een frei funn selli es een fadamma.