Read Pennsylvania German Psalm 115 Bible Online

Psalm 115 - Pennsylvania German bible

Psalm 115

¹Nett zu uns, oh HAH, nett zu uns, avvah zu dei nohma gebb eah, fa dei shtandhaftichi-leevi un voahheit.

²Favass doon di heida frohwa, “Vo is iahra Gott?”

³Unsah Gott is im himmel, eah dutt ennich ebbes es eah vill.

⁴Avvah iahra abgettah sinn silvah un gold; si sinn gmacht mitt di hend funn mensha.

⁵Si henn meilah, avvah si kenna nett shvetza; si henn awwa, avvah si kenna nett sayna.

⁶Si henn oahra, avvah si kenna nett heahra; si henn nays, avvah si kenna nett shmakka.

⁷Si henn hend, avvah si kenna nett feela; si henn fees, avvah si kenna nett lawfa, un si kenna kenn yacht macha mitt iahra hals.

⁸Selli es dee abgettah macha, zayla vadda vi si, un aw awl selli es sich falossa uf si.

⁹Oh Israel, falosset eich uf da HAH; eah is eiyah hilf un shield.

¹⁰Oh haus fumm Aaron, falosset eich uf da HAH; eah is eiyah hilf un shield.

¹¹Diah es da HAH firchtet, falosset eich uf da HAH; eah is eiyah hilf un shield.

¹²Da HAH denkt an uns un saykend uns; eah saykend's haus funn Israel; eah saykend's haus fumm Aaron.

¹³Eah saykend selli es da HAH firchta, di grohsa un di glenna.

¹⁴Loss da HAH eich may un may sayya gevva, eich un aw eiyah kinnah.

¹⁵Diah sind ksaykend bei em HAH, deah es da himmel un di eaht gmacht hott.

¹⁶Da haychsht himmel heaht zumm HAH, avvah eah hott di eaht zu di mensha-kinnah gevva.

¹⁷Di dohda doon da HAH nett lohva, selli es nunnah gayn vo's shtill is.

¹⁸Avvah miah zayla da HAH lohva, funn nau biss in di ayvichkeit. Halleluja!