Read Pennsylvania German Psalm 116 Bible Online

Psalm 116 - Pennsylvania German bible

Psalm 116

¹Ich leeb da HAH, veil eah mei shtimm un mei gebayt keaht hott.

²Veil eah mich abkeicht hott, zayl ich een ohroofa so lang es ich layb.

³Da shtrikk fumm doht hott mich kfanga, da angsht fumm grawb is ivvah mich kumma, ich voah ivvah-gnumma mitt bang un dreebsawl.

⁴No habb ich em HAH sei nohma ohgroofa: “Oh HAH, gebb mei sayl layva!”

⁵Da HAH is gnaydich un gerecht, unsah Gott is bamhatzich.

⁶Da HAH heet selli es sich nett selvaht helfa kenna, vo ich shvach voah, hott eah miah kolfa.

⁷Gay zrikk zu dei roo, mei sayl, fa da HAH voah goot zu diah.

⁸Du hosht mei sayl frei ksetzt fumm doht, mei awwa fumm awwa-vassah, un mei fees funn shtolbahra,

⁹so es ich nau fannich em HAH lawfa kann, im land funn di levendicha.

¹⁰Ich habb geglawbt, even vann ich ksawt habb, “Ich binn am oahrich leida.”

¹¹Un in meim angsht habb ich ksawt, “Awl mensha sinn leeyah.”

¹²Vi kann ich da HAH zrikk betzawla fa alles goodes es eah dutt zu miah?

¹³Ich zayl's kobli funn di saylichkeit uf hayva, un zayl da nohma fumm HAH ohroofa.

¹⁴Ich betzawl zumm HAH vass ich fashprocha habb, fannich awl sei leit.

¹⁵Keshtlich in di awwa fumm HAH, is da doht funn sei saylichi.

¹⁶Oh HAH, ich binn dei gnecht; ich binn dei gnecht un da sohn funn dei mawt, du hosht mich lohs gmacht funn mei kedda.

¹⁷Zu diah zayl ich en dank-opfah macha, un da nohma fumm HAH ohroofa.

¹⁸Ich betzawl zumm HAH vass ich fashprocha habb, fannich awl sei leit,

¹⁹in di foah-hayf fumm HAH sei haus— in di mitt funn diah, oh Jerusalem. Halleluja!