Read Pennsylvania German Psalm 118 Bible Online

Psalm 118 - Pennsylvania German bible

Psalm 118

¹Gevvet dank zumm HAH, fa eah is goot; sei shtandhaftichi-leevi is ayvich.

²Loss Israel sawwa, “Sei shtandhaftichi-leevi is ayvich.”

³Loss es haus fumm Aaron sawwa, “Sei shtandhaftichi-leevi is ayvich.”

⁴Loss selli es da HAH firchta sawwa, “Sei shtandhaftichi-leevi is ayvich.”

⁵In meim angsht habb ich da HAH ohgroofa, un eah hott miah andvat gevva bei mich frei setza.

⁶Da HAH is bei miah, ich zayl mich nett feicha. Vass kenna di mensha du zu miah?

⁷Da HAH is bei miah un helft miah, un ich zayl zufridda uf mei feinda gukka.

⁸Es is bessah fa em HAH drauwa, es vi em falossa uf mensha.

⁹Es is bessah fa em HAH drauwa, es vi em falossa uf di foah-gengah.

¹⁰Awl di heida sinn um mich rumm kumma, avvah im nohma fumm HAH habb ich si abkshnidda.

¹¹Si voahra um mich rumm uf alli seit, avvah im nohma fumm HAH habb ich si abkshnidda.

¹²Si voahra um mich rumm vi eema, avvah vi en danna-feiyah sinn si kshvind ausgebrend; im nohma fumm HAH habb ich si abkshnidda.

¹³Ich voah hatt zrikk kshohva un shiah am falla, avvah da HAH hott miah kolfa.

¹⁴Da HAH is mei macht un mei Psalm, un eah is mei saylichkeit vadda.

¹⁵Di leit singa veyyich di ivvah-hand greeya mitt frayt, in di tents funn di gerechta: “Em HAH sei rechtsi hand hott mechtichi sacha gedu!

¹⁶Em HAH sei rechtsi hand is hohch uf kohva; em HAH sei rechtsi hand hott mechtichi sacha gedu.”

¹⁷Ich zayl nett shtauva, avvah layva, un zayl fazayla vass da HAH gedu hott.

¹⁸Da HAH hott mich shveah kshtrohft, avvah eah hott mich nett ivvah-gevva zumm doht.

¹⁹Mach di doahra funn gerechtichkeit uf fa mich, so es ich deich nei gay kann un da HAH danka.

²⁰Dess is es doah fumm HAH es di gerechta deich nei gayn.

²¹Ich dank dich es du mich keaht hosht, un bisht mei saylichkeit vadda.

²²Da shtay es di shaff-leit zrikk kshmissa henn, is da ekk-shtay vadda.

²³Da HAH hott dess gedu, un's is en vundah fannich unsah awwa.

²⁴Dess is da dawk es da HAH gmacht hott, miah zayla uns froiya un froh sei drinn.

²⁵Helf uns, oh HAH, helf, so es es goot ausshaft fa uns, oh HAH.

²⁶Ksaykend is sellah vo kumd im nohma fumm HAH, miah saykna eich fumm HAH sei haus.

²⁷Da HAH is Gott, eah hott uns licht gevva. Mitt shtrikk in eiyah hend, binnet's opfah, un gaynd nuff an di hanna fumm awldah.

²⁸Du bisht mei Gott, un ich gebb diah dank; du bisht mei Gott, un ich hayb dich hohch uf.

²⁹Gevvet dank zumm HAH, fa eah is goot; sei shtandhaftichi-leevi is ayvich.