Read Pennsylvania German Psalm 119 Bible Online

Psalm 119 - Pennsylvania German bible

Psalm 119

¹Ksaykend sinn selli es en unshuldich layva fiahra, selli es lawfa im ksetz fumm HAH.

²Ksaykend sinn selli es sei zeiknisa halda, selli vo een sucha mitt iahra gans hatz,

³selli es nix letzes doon, un lawfa in sei vayya.

⁴Du hosht dei adnunga nunnah glaykt, un si sella fleisich kalda sei.

⁵Oh es mei vayya yusht shtandhaftich veahra, fa dei gebodda eahnshtlich halda!

⁶No breicht ich mich nett shemma, veil ich mei awwa uf dei gebodda hett.

⁷Ich zayl dich danka mitt en ufrichtich hatz, vann ich di adnunga funn dei gerechtichkeit lann.

⁸Dei gebodda zayl ich halda, oh du mich nee nett falossa.

⁹Vi kann en yungah mann sei vayk sauvah halda? Bei layva vi dei vatt sawkt.

¹⁰Ich such dich mitt mei gans hatz, loss mich nett vekk gay funn dei gebodda.

¹¹Ich hald dei vatt in meim hatz, so es ich nett sindich geyyich dich.

¹²Glohbt bisht du, oh HAH, lann mich dei gebodda.

¹³Mitt mei leftz fazayl ich awl di adnunga funn deim maul.

¹⁴Ich froi mich ivvah da vayk funn dei zeiknissa, may es fa oahrich reich sei.

¹⁵Ich denk dei adnunga ivvah, un nemm dei vayya zu hatz.

¹⁶Ich habb frayt in dei gebodda, un zayl dei vatt nett fagessa.

¹⁷Sei goot zu miah, dei gnecht, so es ich layb un dei vatt halda du.

¹⁸Mach mei awwa uf so es ich di vundahboahra sacha in deim ksetz sayna kann.

¹⁹Ich binn en fremdah do uf di eaht, fashtekkel dei gebodda nett funn miah.

²⁰Mei sayl fazeaht sich mitt en falanga fa dei adnunga di gans zeit.

²¹Du zanksht di shtolsa es faflucht sinn, selli es vekk lawfa funn dei gebodda.

²²Loss si mich nett fa'achta un fashpodda, fa ich hald dei zeiknisa.

²³Even vann roolahs hokka un geyyich mich shvetza, dann hald dei gnecht sich alsnoch uf mitt dei gebodda.

²⁴Ich habb frayt mitt dei zeiknisa, si sinn mei roht-gevvah.

²⁵Mei sayl is niddah glaykt in da shtawb, mach mich viddah shteik deich dei vatt.

²⁶Ich habb diah ksawt veyyich mei vayya, un du hosht mich keaht; lann mich dei gebodda.

²⁷Mach mich da vayk funn dei adnunga fashtay, no hald ich oh denka an dei vundahra.

²⁸Mei sayl heild mitt dreebsawl, mach mich shteik vi dei vatt sawkt.

²⁹Hald mich funn falshi vayya, un sei gnaydich zu miah deich dei ksetz.

³⁰Ich habb da vayk funn dei voahheit uf gnumma; ich habb dei adnunga fannich mich ksetzt.

³¹Ich hayb oh zu dei zeiknisa, oh HAH, loss mich nett fashohmd sei.

³²Ich lawf im vayk funn dei gebodda, fa du hosht mei hatz gedraysht.

³³Lann mich da vayk funn dei gebodda, oh HAH, un ich zayl si halda biss an's end.

³⁴Mach mich fashtay, so es ich dei ksetz halda kann, un's du mitt meim gans hatz.

³⁵Fiah mich in di pawt funn dei gebodda, fa si is miah kfellich.

³⁶Dray mei hatz zu dei zeiknisa, un nett zu lusht fa sacha.

³⁷Dray mei awwa vekk funn sacha gukka es nix veaht sinn, mach mich shteik in dei vayya.

³⁸Folfill vass du fashprocha hosht zu deim gnecht, so es ich di furcht funn diah habb.

³⁹Nemm vekk da shohm es ich feich, fa dei adnunga sinn goot.

⁴⁰Gukk moll, ich habb en falanga fa dei adnunga, gebb miah layva in dei gerechtichkeit.

⁴¹Loss dei shtandhaftichi-leevi zu miah kumma, oh HAH, mach mich saylich so vi du fashprocha hosht.

⁴²No kann ich andvat gevva zu sellah es mich fashpodda dutt, fa ich faloss mich uf dei vatt.

⁴³Nemm nett's vatt funn di voahheit aus meim maul, fa ich hoff in dei adnunga.

⁴⁴Ich zayl dei ksetz di gans zeit halda, immah un ayvichlich.

⁴⁵Ich zayl rumm lawfa in freiheit, veil ich dei adnunga such.

⁴⁶Ich zayl shvetza veyyich dei zeiknisa fannich kaynicha, un ich zayl mich nett shemma.

⁴⁷Ich habb frayt in dei gebodda, veil ich si leeb habb.

⁴⁸Ich hayb mei hend uf zu dei gebodda, dee es ich leeb habb, un denk dei gebodda ivvah.

⁴⁹Denk an's vatt zu deim gnecht, sell es miah hofning gebt.

⁵⁰Mei drohsht in dreebsawl is dess, es dei vatt miah layva gebt.

⁵¹Di shtolsa doon mich veesht fashpodda, avvah ich dray nett vekk funn deim ksetz.

⁵²Vann ich an dei adnunga denk funn lang zrikk, oh HAH, dann binn ich gedraysht.

⁵³Haysah zann kumd ivvah mich veyyich di gottlohsa, veil si dei ksetz falossa henn.

⁵⁴Dei gebodda sinn mei leet, vo-evvah es ich mei haymet mach.

⁵⁵In di nacht denk ich an dei nohma, oh HAH, un ich zayl dei ksetz halda.

⁵⁶Dess is zu miah kfalla, veil ich dei adnunga hald.

⁵⁷Du bisht mei dayl, oh HAH, un ich fashprech fa dei vadda halda.

⁵⁸Ich such fa kfellich sei zu diah mitt meim gans hatz, sei gnaydich zu miah vi dei vatt sawkt.

⁵⁹Ich habb an mei vayya gedenkt, un habb mei fees noch dei zeiknisa gedrayt.

⁶⁰Ich dummel mich un du's nett ab fa dei gebodda halda.

⁶¹Di gottlohsa henn mich gebunna mitt shtrikk, avvah ich habb dei ksetz nett fagessa.

⁶²Am halb-nacht shtayn ich uf un dank dich, fa dei gerechti adnunga.

⁶³Ich binn en freind zu awl selli es dich firchta, zu awl selli es dei gebodda halda.

⁶⁴Di eaht is kfild mitt dei shtandhaftichi-leevi, oh HAH, lann mich dei gebodda.

⁶⁵Du hosht goot gedu zu deim gnecht, oh HAH, un hosht dei vatt kalda.

⁶⁶Lann mich goodi eisicht es ich sach fashtay, fa ich glawb an dei gebodda.

⁶⁷Eb ich gedaymeedicht voah, binn ich als letz ganga, avvah nau hald ich dei vatt.

⁶⁸Du bisht goot un dusht goot, lann mich dei gebodda.

⁶⁹Di shtolsa henn mei nohma fashmiaht mitt leeya, ich hald dei adnunga mitt mei gans hatz.

⁷⁰Iahra hatz is hatt un fashtokt, avvah ich habb frayt in deim ksetz.

⁷¹Es voah goot es ich gedaymeedicht voah, so es ich dei gebodda lanna habb kenna.

⁷²Es ksetz funn dei maul is miah leevah, es dausends funn shtikkah silvah un gold.

⁷³Dei hend henn mich gmacht un kshaffa, gebb miah eisicht, so es ich dei gebodda lanna kann.

⁷⁴Selli es dei furcht henn, froiya sich vann si mich sayna, veil ich hofning in dei vatt du.

⁷⁵Oh HAH, ich vays es dei richta gerecht sinn, un es du mich gedaymeedicht hosht veil du shtandhaftich bisht.

⁷⁶Loss dei shtandhaftichi-leevi mei drohsht sei, so vi du deim gnecht fashprocha hosht.

⁷⁷Loss dei bamhatzichkeit zu miah kumma so es ich layb, fa ich habb frayt in deim ksetz.

⁷⁸Loss di shtolsa sich shemma fa miah letz du unni shuld, avvah ich hald mich uf mitt dei adninga.

⁷⁹Loss selli es dich firchta sich zu miah drayya, awl selli es dei zeiknisa vissa.

⁸⁰Loss mei hatz unshuldich sei in dei gebodda, so es ich mich nett shemma muss.

⁸¹Mei sayl hott en falanga fa dei saylichkeit, ich du mei hofning in dei vatt.

⁸²Mei awwa sinn dreeb funn dei vatt vatsha, un ich sawk, “Vann zaylsht du mich drayshta?”

⁸³Ich binn am vadda vi en leddah vei-sakk im shmohk, avvah doch ich habb dei gebodda nett fagessa.

⁸⁴Vi lang muss dei gnecht voahra? Vann zaylsht du selli richta es mich fafolka?

⁸⁵Di shtolsa grawva lechah es ich nei falla soll, un doon nett dei ksetz nohch gay.

⁸⁶Dei gebodda kenna awl gedraut sei; helf miah, fa mennah fafolka mich mitt leeya.

⁸⁷Si henn mich shiah umgebrocht uf di eaht, avvah ich habb dei adnunga nett falossa.

⁸⁸Deich dei shtandhaftichi-leevi, mach mei layva viddah shteik, so es ich di zeiknisa funn deim maul halda kann.

⁸⁹Dei vatt, oh HAH, is ayvichlich im himmel, un shtayt fesht fa'immah.

⁹⁰Dei shtandhaftichkeit shtayt fa'immah un immah, du hosht di eaht fesht gegrund un si bleibt shtay.

⁹¹Si shtayt heit noch deich dei adnunga, fa alles muss dich deena.

⁹²Vann dei ksetz nett mei drohsht gvest veah, dann veah ich kshtauva in mei aylend.

⁹³Ich zayl nee nett dei adnunga fagessa, fa deich si hosht du miah layva gevva.

⁹⁴Helf miah, fa ich binn dei, ich habb dei adnunga ausksucht.

⁹⁵Di gottlohsa sinn am voahra fa mich umbringa, avvah ich hald mich uf mitt dei zeiknisa.

⁹⁶Ich habb ksenna es alles en end hott, avvah dei gebott is oahrich brayt.

⁹⁷Oh, vi leeblich is dei ksetz zu miah! Ich denk drivvah da gans dawk lang.

⁹⁸Dei gebott gebt miah may veisheit es mei feinda henn, fa's is immah bei miah.

⁹⁹Ich habb may eisicht es awl mei teetshahs, veil ich mich uf hald mitt dei zeiknisa.

¹⁰⁰Ich fashtay sacha bessah es di eldahra, veil ich dei gebodda hald.

¹⁰¹Ich hald mei fees vekk funn alli evili pawt, so es ich dei vatt halda kann.

¹⁰²Ich habb mich nett vekk gedrayt funn dei adnunga, fa du selvaht hosht mich gland.

¹⁰³Oh, vi sees sinn dei vadda zu miah, seesah es hunnich zu mei maul.

¹⁰⁴Ich fashtay sacha deich dei adnunga, fasell hass ich alli falshah vayk.

¹⁰⁵Dei vatt is en licht zu mei fees, un helling fa mei pawt.

¹⁰⁶Ich habb kshvoahra, un zayl's du, es ich dei gerechti adnunga halda zayl.

¹⁰⁷Ich binn am feel leida deich macha, gebb miah layva, oh HAH, vi dei vatt fashprecht.

¹⁰⁸Nemm di opfahra oh funn meim maul, oh HAH, un lann dei adnunga zu miah.

¹⁰⁹Mei layva is immah in di kfoah, avvah ich fagess dei ksetz nett.

¹¹⁰Di gottlohsa henn en shtrikka-shling ksetzt fa mich, avvah ich habb dei adnunga nett falossa.

¹¹¹Dei zeiknisa sinn mei eahbshaft fa'immah, fa si sinn di frayt funn meim hatz.

¹¹²Ich habb mei hatz ksetzt fa dei gebodda halda, fa'immah biss an's end.

¹¹³Ich hass zvay-ksichtichi mennah, avvah dei ksetz is miah leeblich.

¹¹⁴Du bisht mei shield un da blatz es ich mich fashtekla kann, ich du mei hofning in dei vatt.

¹¹⁵Gaynd vekk funn miah, diah gottlohsi, so es ich di gebodda funn meim Gott halda kann.

¹¹⁶Hayb mich uf vi du fashprocha hosht in deim vatt, so es ich layb, un loss mich nett nunnah glost sei in mei hofning.

¹¹⁷Mach mich shteik, so es ich frei gmacht binn, un dei gebodda immah uf hayva kann.

¹¹⁸Du draysht nunnah awl selli es vekk drayya funn dei gebodda, fa iahra shkeems sinn alles fa nix.

¹¹⁹Du shmeisht awl di gottlohsa naus vi trash, fasell sinn dei zeiknisa miah leeblich.

¹²⁰Ich feich mich so veyyich diah es ich ziddah, ich feich mich veyyich dei gerichtes.

¹²¹Ich du vass gerechtich un recht is, dray mich nett ivvah zu selli es mich nunnah dredda vella.

¹²²Shtay goot fa dei gnecht un draysht een, Loss di shtolsa mich nett nunnah dredda.

¹²³Mei awwa sinn dreeb funn gukka fa dei saylichkeit, un fa's vatt funn dei gerechtichkeit.

¹²⁴Shaff mitt deim gnecht noch dei shtandhaftichi-leevi, un lann dei gebodda zu miah.

¹²⁵Ich binn dei gnecht, gebb miah eisicht, so es ich dei zeiknisa fashtay kann.

¹²⁶Es is zeit es du, da HAH, ebbes dusht, fa dei ksetz is am gebrocha vadda.

¹²⁷Fasell habb ich dei gebodda leeblich, may es gold, yau, may es fei gold.

¹²⁸Un fasell lawf ich pinklich noch dei adnunga, un ich hass alli falshah vayk.

¹²⁹Dei zeiknisa sinn vundahboah, un fasell dutt mei sayl si halda.

¹³⁰Vann dei vatt fashtanna vatt, gebt's licht, un's gebt eisicht zu selli es nett fashtayn.

¹³¹Ich shnauf hatt mitt mei maul grohs uf, veil ich en falanga habb fa dei gebodda.

¹³²Dray dich zu miah un sei gnaydich zu miah, so vi du dusht zu awl selli es dich leeb henn.

¹³³Hald mei fees am dei vatt nohch gay, un loss evil mich nett ivvah-kumma.

¹³⁴Hald mich funn nunnah gedrikt sei bei mensha, so es ich dei adnunga halda kann.

¹³⁵Loss dei ksicht uf dei gnecht sheina, un lann dei gebodda zu miah.

¹³⁶Es awwa-vassah lawft aus mei awwa, veil leit dei ksetz nett halda.

¹³⁷Du bisht gerecht, oh HAH, un dei richtes is recht.

¹³⁸Du hosht dei zeiknisa gevva in gerechtichkeit, si kenna folshtendich gedraut sei.

¹³⁹Mei eahnsht veaht mich aus, veil mei feinda dei vadda fagessa henn.

¹⁴⁰Dei vatt kann falossa sei druff, un dei gnecht hott's leeb.

¹⁴¹Ich binn nett hohch ufkohva un leit gukka nunnah uf mich, avvah ich fagess dei adnunga nett.

¹⁴²Dei gerechtichkeit is en ayvichi gerechtichkeit, un dei ksetz is voahheit.

¹⁴³Angsht un druvvel sinn ivvah mich kumma, avvah dei gebodda bringa miah frayt.

¹⁴⁴Dei zeiknisa sinn gerecht fa'immah, helf mich fashtay, so es ich layva kann.

¹⁴⁵Ich roof zu diah mitt mei gans hatz, gebb andvat, oh HAH; ich zayl dei gebodda halda.

¹⁴⁶Ich roof naus zu diah, helf miah, ich zayl dei zeiknisa halda.

¹⁴⁷Ich shtay uf eb dawk un roof fa hilf, ich du mei hofning in dei vadda.

¹⁴⁸Ich lei vakkah di gans nacht, fa ivvah dei vatt denka.

¹⁴⁹Deich dei shtandhaftichi-leevi, heich mei shtimm ab, deich dei gerechtich richtes, hald mei layva sayf, oh HAH.

¹⁵⁰Mei shneekichi fafolkah, sinn am nayksht kumma, si sinn veit vekk funn deim ksetz.

¹⁵¹Avvah du bisht nayksht, oh HAH, un awl dei gebodda sinn voahheit.

¹⁵²Lang zrikk habb ich gland veyyich dei zeiknisa, un es du si shtay gmacht hosht fa'immah.

¹⁵³Gukk an mei aylend un setz mich frei, fa ich habb dei ksetz nett fagessa.

¹⁵⁴Shvetz fa mich un setz mich frei, gebb miah layva deich dei vatt.

¹⁵⁵Di saylichkeit is veit vekk funn di gottlohsa, fa si heicha dei gebodda nett.

¹⁵⁶Dei bamhatzichkeit is grohs, oh HAH, gebb miah layva so vi dei adnunga sawwa.

¹⁵⁷Ich habb feel feinda un fafolyah, avvah ich dray nett vekk funn dei zeiknisa.

¹⁵⁸Vann ich di unglawvicha sayn dutt's miah vay, veil si dei vatt nett halda.

¹⁵⁹Gukk moll vi leeb es ich dei adnunga habb; gebb miah layva, oh HAH, deich dei shtandhaftichi-leevi.

¹⁶⁰Dei vatt is di gans voahheit, un awl funn dei gerechti adnunga sinn ayvich.

¹⁶¹Evvahshti fafolka mich unni shuld, avvah mei hatz shtayt in furcht funn deim vatt.

¹⁶²Ich froi mich ivvah dei vatt, so es vi ebbah es oahrich keshtlich sach find.

¹⁶³Ich hass un gleich nett falshheit, avvah ich habb dei ksetz leeb.

¹⁶⁴Ich lohb dich sivva mohl da dawk, fa dei gerechti adnunga.

¹⁶⁵Selli es dei ksetz leeb henn, henn grohsah fridda, un nix kann si shtolbahra macha.

¹⁶⁶Ich voaht fa dei saylichkeit, oh HAH, un hald dei gebodda.

¹⁶⁷Mei sayl hald dei zeiknisa, un ich habb grohsi leevi fa si.

¹⁶⁸Ich hald dei adnunga un dei gebodda, fa awl mei vayya sinn fannich diah.

¹⁶⁹Loss mei roof fa hilf fannich dich kumma, oh HAH, gebb miah eisicht fa fashtay deich dei vatt.

¹⁷⁰Loss mei gebayt fannich dich kumma, mach mich frei deich dei vatt.

¹⁷¹Mei leftz zayla diah lohb gevva, veil du mich dei gebodda lansht.

¹⁷²Mei zung zayld singa funn deim vatt, fa awl dei gebodda sinn gerecht.

¹⁷³Loss dei hand grisht sei fa miah helfa, fa ich habb dei adnunga ohgnumma.

¹⁷⁴Ich habb en falanga fa dei saylichkeit, oh HAH, un ich habb frayt in deim ksetz.

¹⁷⁵Loss mei sayl layva, so es ich dich lohva kann, un loss dei adnunga miah helfa.

¹⁷⁶Ich binn vekk gloffa vi en faloahra shohf, so kumm un gukk fa dei gnecht, fa ich zayl dei gebodda nett fagessa.