Read Pennsylvania German Psalm 124 Bible Online

Psalm 124 - Pennsylvania German bible

Psalm 124

¹Fumm Dawfit. En leet fa ksunga sei uf em vayk nuff an Jerusalem. Vann da HAH nett uf unsah seit gvest veah— loss Israel nau sawwa—

²“Vann da HAH nett uf unsah seit gvest veah, vo mensha sich ufkshteld henn geyyich uns,

³dann hedda si uns levendich uf kshlukt, vo iahra zann gebrend hott geyyich uns;

⁴no hett's vassah uns vekk gedrawwa, un di vella veahra ovva ivvah uns gvest,

⁵di rawsicha vassahra veahra ivvah unsah sayl kumma.”

⁶Lohb sei zumm HAH, es eah uns nett glost hott farissa sei bei iahra zay.

⁷Unsah sayl is difunn kflowwa vi en fokkel aus di shtrikka-shling fumm hundah; di shling is farissa un miah sinn difunn kflowwa.

⁸Unsah hilf is im nohma fumm HAH, deah es da himmel un di eaht gmacht hott.