Read Pennsylvania German Psalm 132 Bible Online

Psalm 132 - Pennsylvania German bible

Psalm 132

¹En leet fa ksunga sei uf em vayk nuff an Jerusalem. Oh HAH, denk an da Dawfit, un an alles es eah deich gmacht hott.

²Eah hott kshvoahra zumm HAH, un hott fashprocha zumm Mechticha Gott fumm Jakob:

³“Ich gay nett in mei haus, adda in mei bett;

⁴ich alawb kenn shlohf zu mei awwa kumma, un loss mei awwa-dekkel nett shlayfahrich vadda,

⁵biss ich en blatz finn fa da HAH, en haymet fa da Mechtich Gott fumm Jakob.”

⁶Gukk moll, miah henn keaht veyyich di Bundes-Lawt in Ephratha, miah henn see kfunna in di feldah funn Jaar,

⁷“Vella an sei voon-blatz gay, vella een ohbayda an sei foos-shtool.

⁸Shtay uf, oh HAH, un kumm zu dei Roo-Blatz, du un di Lawt funn dei Macht.

⁹Loss dei preeshtah geglayt sei mitt gerechtichkeit, un loss dei saylichi singa mitt frayt.”

¹⁰Fa di sayk fumm Dawfit dei gnecht, dray dei ksicht nett vekk funn dei ksalbdah.

¹¹Da HAH hott kshvoahra zumm Dawfit, un funn demm drayt eah sich nett zrikk: “Ich zayl aynah uf dei kaynich-shtool setza, aynah es kumd aus deim leib.

¹²Vann dei boova mei bund halda, un mei zeiknisa es ich si lanna zayl, no doon iahra boova aw uf deim kaynich-shtool hokka fa'immah.”

¹³Fa da HAH hott Zion raus glaysa, un hott en falanga fa datt voona.

¹⁴“Dess is mei roo-blatz fa'immah, do vill ich voona veil's miah kfalla dutt.

¹⁵Ich zayl Zion saykna mitt alles es see brauch, ich zayl iahra oahmi satt macha mitt broht.

¹⁶Ich zayl iahra preeshtah glaydah mitt saylichkeit, un iahra saylichi zayla singa mitt frayt.

¹⁷Datt zayl ich's hann fumm Dawfit vaxa macha; ich habb en licht ufkokt fa mei ksalbdah.

¹⁸Ich zayl sei feinda glaydah mitt shohm, avvah da krohn uf sei kobb zayld sheina.”