Read Pennsylvania German Psalm 135 Bible Online

Psalm 135 - Pennsylvania German bible

Psalm 135

¹Lohb sei zumm HAH! Lohvet da nohma fumm HAH; Lohvet een, diah gnechta fumm HAH,

²diah es im HAH sei haus shtaynd, in di foah-hayf funn Gott sei haus.

³Lohvet da HAH, fa da HAH is goot, singet lohb zu sei nohma, fa sell is blesiahlich.

⁴Da HAH hott da Jakob raus glaysa fa sich selvaht, un hott Israel gmacht fa sei ayknes sei.

⁵Ich vays es da HAH grohs is, un es unsah HAH ovvich awl anri gettah is.

⁶Da HAH dutt vass-evvah es eah vill im himmel un uf di eaht, im say un in di deefa bletz.

⁷Eah macht di volka uf kumma fumm end funn di eaht, eah shikt gviddah un reyyah, un bringd da vind aus sei shtoah-heisah.

⁸Eah hott di eahsht-geboahrana funn Egypta nunnah kshlauwa, di eahsht-geboahrana funn mensha un fee.

⁹Eah hott zaycha un vundahra in di mitt funn dich kshikt, oh Egypta-Land, geyyich da Pharao un awl sei gnechta.

¹⁰Eah hott di leit funn feel lendah nunnah kshlauwa, un hott mechtichi kaynicha doht gmacht,

¹¹da Sihon, da kaynich funn di Amoriddah, da Og, da kaynich funn Bason, un awl di kaynicha in Kanaan.

¹²Un eah hott iahra land gevva fa en eahbshaft, en eahbshaft zu sei leit Israel.

¹³Oh HAH, dei nohma bleibt fa'immah. Vass du gedu hosht zayld nee nett fagessa sei, oh HAH, un vatt gmeind fa'immah un immah.

¹⁴Da HAH zayld sei leit richta, un zayld gnaydich sei zu sei gnechta.

¹⁵Di abgettah funn di heida sinn silvah un gold, dee sinn gmacht bei mensha hend.

¹⁶Si henn meilah, avvah si kenna nett shvetza, un awwa, avvah si kenna nett sayna;

¹⁷si henn oahra, avvah si kenna nett heahra, un si henn kenn ohften in iahra meilah.

¹⁸Selli es dee abgettah macha, zayla vadda vi si, un aw awl selli es sich falossa uf si.

¹⁹Oh haus funn Israel, lohb da HAH! Oh haus fumm Aaron, lohb da HAH!

²⁰Oh haus fumm Levi, lohb da HAH! Diah es een firchta, lohvet da HAH!

²¹Glohbt is da HAH funn Zion, sellah es in Jerusalem voond. Halleluja!