Read Pennsylvania German Psalm 139 Bible Online

Psalm 139 - Pennsylvania German bible

Psalm 139

¹Zumm foah-singah. En Psalm fumm Dawfit. Oh HAH, du hosht mich innahlich ausksucht, un du kensht mich.

²Du vaysht's vann ich mich anna hokk, un vann ich uf shtay; du vaysht mei gedanka funn veit ab.

³Du vaysht's vann ich naus gay, un vann ich mich anna layk; du bisht bekand mitt awl mei vayya.

⁴Even eb en vatt uf mei zung is, dann vaysht du's shund, oh HAH.

⁵Du bisht gans um mich rumm uf alli seida, un haldsht dei hand ivvah mich.

⁶So eisicht is zu vundahboah un zu hohch fa mich, ich kann dess nett begreifa.

⁷Vo kann ich hee gay, vekk funn deim Geisht? Vo kann ich anna gay es du nett datt bisht?

⁸Vann ich nuff in da himmel gay, dann bisht du datt; vann ich mich anna layk in's grawb, dann bisht du aw datt.

⁹Vann ich anna fleek vo da meiya-roht is, adda im ausahshta say bleib,

¹⁰even datt dutt dei hand mich fiahra, un dei rechtsi hand mich uf hayva.

¹¹Vann ich sawwa dayt, “Loss es dunkla mich zu dekka, un loss es licht um mich rumm sei vi nacht,”

¹²dann veah's dunkla nett dunkel zu diah, un di nacht veah so hell es dawk, fa's dunkla is vi licht zu diah.

¹³Du hosht mei innahlich leib gmacht, un hosht mich zammah gedu in mei muddah iahra leib.

¹⁴Ich gebb dank zu diah, veil ich furchtboah un vundahboahlich gmacht binn, dei verka sinn vundahboah, un dess vayst mei sayl goot.

¹⁵Mei gnocha voahra nett fashtekkeld funn diah, vo ich ruich-kalda gmacht voah, vo ich zammah gedu voah im muddahs-leib funn di eaht.

¹⁶Dei awwa henn mich ksenna eb ich zammah gedu voah, un awl di dawwa es gevva voahra fa mich voahra ufkshrivva in dei buch, eb si blatz gnumma henn.

¹⁷Oh Gott, vi keshtlich sinn dei gedanka zu miah, un vi feel funn si sinn's!

¹⁸Vann ich si zayla vett, veahra si may es da sand. Vann ich uf vekk, dann binn ich alsnoch bei diah.

¹⁹Oh Gott, vann du yusht di gottlohsa umbringa daytsht, un di bloot-dashtichi mennah funn miah vekk gay dayda!

²⁰Si sawwa leshtahrichi sacha geyyich dich, un shvetza gottlohsi sacha veyyich dei nohma.

²¹Oh HAH, doon ich nett selli hassa es dich hassa? Un doon ich nett selli niddah hayva es sich geyyich dich shtella?

²²Ich habb nix es yusht hass fa si; ich nemm si fa mei feinda sei.

²³Gukk in mei innahlichah mensh, oh Gott, un sayn vass in meim hatz is, broviah mich un sayn mei engshtlichi gedanka.

²⁴Gukk un sayn eb ennichah gottlohsah vayk in miah is, un fiah mich uf em ayvicha vayk.