Read Pennsylvania German Psalm 140 Bible Online

Psalm 140 - Pennsylvania German bible

Psalm 140

¹En Psalm fumm Dawfit. Zumm foah-singah. Mach mich frei funn evili mensha, oh HAH, hald mich aus di kfoah funn mennah es gvald yoosa,

²funn so mennah es evili sacha shkeema im hatz, un shtreit ufshtadda di gans zeit.

³Si macha iahra zunga shauf vi shlanga iahri, un shlanga-gift is unnich iahra leftz. (Sela)

⁴Hald mich aus di hend funn di gottlohsa, oh HAH, hald mich aus di kfoah funn mennah es gvald yoosa, un es shkeema fa mich shtolbahra macha.

⁵Shtolsi mennah henn en fall ksetzt fa mich, si henn en net ausnannah glaykt, un henn si ufketzt am vayk nohch. (Sela)

⁶Ich sawk zumm HAH, “Du bisht mei Gott.” Heich mei shtimm oh vi ich roof fa hilf, oh HAH.

⁷Oh Almechtichah HAH, mei shteiki hilf, du haldsht mei kobb zu gedekt im dawk funn greek.

⁸Oh HAH, gebb di gottlohsa nett vass si havva vella, helf eena nett mitt vass si im sinn henn, adda si vadda shtols. (Sela)

⁹Loss di kebb funn selli es um mich rumm sinn zu gedekt sei mitt em druvvel es iahra leftz gedroit henn.

¹⁰Loss roht haysi kohla uf si falla, loss si in's feiyah kshmissa sei, in deefi lechah es si nee nimmi raus kenna.

¹¹Loss es nett goot gay uf di eaht mitt selli es kshvetzah shtroiya. Loss selli es gvald yoosa ivvah-kumma sei mitt evil.

¹²Ich vays es da HAH di sacha funn di oahma recht ausshaffa zayld, un eah gebt selli es noht henn iahra recht.

¹³Di gerechta zayla geviss dei nohma preisa, un di ufrichticha zayla bei diah voona.