Read Pennsylvania German Psalm 142 Bible Online

Psalm 142 - Pennsylvania German bible

Psalm 142

¹En shreives fumm Dawfit, vo eah im felsa-loch voah; en gebayt. Ich roof zumm HAH mitt mei shtimm; mitt mei shtimm bitt ich da HAH fa bamhatzichkeit.

²Ich leah mei beglawk aus fannich eem, fannich eem sawk ich awl mei druvvel.

³Vann's meim geisht angsht vatt, is es dich es mei pawt vayst. Im vayk vo ich lawf henn si en fall ksetzt fa mich.

⁴Gukk uf mei rechtsi seit un sayn, nimmand nemd acht funn miah, 'sis neiyets es ich hee fleeya kann, nimmand gebt ebbes um mich.

⁵Ich roof zu diah, oh HAH, ich sawk, “Du bisht mei Roo-Blatz, mei dayl im land funn di levendicha.”

⁶Heich mich oh, fa ich habb en grohsi noht. Mach mich frei funn selli es mich fafolka, fa si sinn zu shteik fa mich.

⁷Bring mich aus demm kfengnis, so es ich dei nohma danka kann. Di gerechta zayla sich um mich rumm fasamla, veil du so goot bisht zu miah.