Read Pennsylvania German Psalm 143 Bible Online

Psalm 143 - Pennsylvania German bible

Psalm 143

¹En Psalm fumm Dawfit. Heich mei gebayt ab, oh HAH, heich vann ich roof fa bamhatzichkeit; in dei shtandhaftichkeit un gerechtichkeit, gebb miah andvat.

²Gay nett in's gericht mitt dei gnecht, fa fannich diah is nimmand levendiches gerecht.

³Da feind is miah nohch kumma, eah hott mich nunnah in da bodda gedredda; eah hott mich gmacht im dunkla sei, vi selli es shund lang doht sinn.

⁴Fasell is mei geisht shvach in miah, mei hatz in miah hott moot faloahra.

⁵Ich meind noch di dawwa funn lang zrikk; ich denk ivvah awl di sacha es du gedu hosht, un denk zrikk an vass dei hend gedu henn.

⁶Ich shtrekk mei hend naus zu diah, mei sayl is dashtich fa dich es vi en drukka land. (Sela)

⁷Gebb miah kshvind andvat, oh HAH, mei geisht hott kenn hofning. Fashtekkel dei ksicht nett funn miah, adda ich va vi selli es nunnah in's grawb gayn.

⁸Loss mich funn dei shtandhaftichi-leevi heahra meiyets; ich habb mei fadrauwa in dich gedu. Veis miah da vayk es ich gay soll, ich hayb mei sayl uf zu diah im gebayt.

⁹Mach mich frei funn mei feinda, oh HAH, ich gukk zu diah fa mich aus di kfoah nemma.

¹⁰Lann mich fa dei villa du, fa du bisht mei Gott; loss dei goodah Geisht mich uf en ayvani pawt fiahra.

¹¹Fa's goot funn dei nohma, oh HAH, loss mich layva; in dei gerechtichkeit bring mich aus meim druvvel.

¹²In dei shtandhaftichi-leevi bring mei feinda zu nix; un bring selli um es mei sayl angsht macha, fa ich binn dei gnecht.