Read Pennsylvania German Psalm 144 Bible Online

Psalm 144 - Pennsylvania German bible

Psalm 144

¹En Psalm fumm Dawfit. Glohbt is da HAH, mei Felsa, deah es mei hend land fa fechta, un mei fingah fa greek macha.

²Da HAH is en Felsa un en shteik greeks-haus zu miah, eah is en shteik gebei un eah setzt mich frei. Eah is mei shield un hald mich aus di kfoah, eah dutt di leit ivvah-kumma un dutt si unnich mich.

³HAH, vass is da mensh es du een achtsht, un da mensha sohn es du an een denksht?

⁴Da mensh is vi en ohften, sei dawwa sinn vi en shadda es fagayt.

⁵Mach dei himmel uf, oh HAH, un kumm runnah, du di berga ohrayya, so es si shmohka.

⁶Shikk gviddah un shtroi dei feinda ausnannah, shees dei arrows un fayawk si.

⁷Shtrekk dei hand runnah funn drovva in di hay; zeek mich raus un mach mich frei funn di mechticha vassahra, aus di hend funn fremdi,

⁸selli es meilah henn es leeya, un rechtsi hend henn es falsh sinn.

⁹Ich vill diah en nei leet singa, oh Gott; ich vill shpeela zu diah mitt di zeyya-kshtringd harf,

¹⁰du es di evvahsht-hand gebsht zu kaynicha, du es dei gnecht da Dawfit aus di kfoah fumm shvatt nemsht.

¹¹Mach mich frei un nemm mich aus di hand funn fremdi, selli es meilah henn es leeya, un rechtsi hend henn es falsh sinn.

¹²Loss unsah yungi boova sei vi gvaxani blansa, un unsah yungi mayt vi shtay-poshta es kakt sinn fa en kaynich-haus.

¹³Loss unsah sheiyahra foll sei mitt alli sadda frucht; loss unsah shohf sich fameahra bei di dausend, un bei di zeyya dausend in di feldah.

¹⁴Loss unsah kee shveah drawwa, un yungi greeya unni ennichi faliahra. Loss nimmand sich feicha un naus greisha in unsah shtrohsa.

¹⁵Ksaykend sinn di leit vann's so gayt mitt eena; ksaykend sinn di leit es Gott henn fa iahra HAH.