Read Pennsylvania German Psalm 145 Bible Online

Psalm 145 - Pennsylvania German bible

Psalm 145

¹En lohb-leet fumm Dawfit. Ich vill dich uf hayva, mei Gott un Kaynich, un dei nohma lohva fa'immah un immah.

²Alli dawk vill ich dich lohva, un dei nohma preisa fa'immah un immah.

³Da HAH is grohs, un is es veaht fa gepreist sei; sei grohsi eah is unbegreiflich.

⁴Vass du gedu hosht vatt gepreist funn ay nohch-kummashaft zu di neksht; si fazayla veyyich dei mechtichi verka.

⁵Ich zayl shvetza veyyich dei hallichkeit un kaynich-eah, un ich vill ivvah dei vundahboahri verka denka.

⁶Leit zayla shvetza veyyich dei mechtichi verka, un ich zayl shvetza veyyich dei hallichkeit.

⁷Si zayla sawwa vi goot-maynich es du bisht, un zayla singa veyyich dei gerechtichkeit.

⁸Da HAH is bamhatzich un gnaydich, eah vatt nett kshvind bays, un hott grohsi leevi.

⁹Da HAH is goot zu alli-ebbah, eah is bamhatzich zu alles es eah gmacht hott.

¹⁰Alles es du gmacht hosht gebt dank zu diah, oh HAH, un dei saylichi zayla dich lohva.

¹¹Si zayla shvetza veyyich di hallichkeit funn dei Kaynich-Reich, un veyyich dei macht,

¹²so es leit vissa kenna veyyich dei mechtichi kshefta, un da hallich glitzah funn dei Kaynich-Reich.

¹³Dei Kaynich-Reich is en ayvich reich, un dei Kaynich-Macht bleibt deich alli nohch-kummashaft. Da HAH is shtandhaftich in alles es eah fashprocha hott, un gnaydich zu alles es eah gmacht hott.

¹⁴Da HAH haybt awl selli uf es anna falla, un macht selli grawt es nunnah gebohwa sinn.

¹⁵Di awwa funn alli-ebbah gukka zu diah, un du gebsht eena ess-sach an di recht zeit.

¹⁶Du machsht dei hand uf, un machsht zufridda di falanga funn alles levendiches.

¹⁷Da HAH is gerecht in awl sei vayya, un bamhatzich zu alles es eah gmacht hott.

¹⁸Da HAH is nayksht bei awl selli es een ohroofa, bei awl selli es een eahnshtlich ohroofa.

¹⁹Eah folfild di falanga funn selli es een firchta, eah heaht si roofa un helft eena.

²⁰Da HAH vatsht ivvah awl selli es een leeb henn, avvah di gottlohsa bringd eah um.

²¹Mei maul zayld da lohb fumm HAH fazayla; loss alli-ebbes sei heilichah nohma preisa fa'immah un immah.