Read Pennsylvania German Psalm 147 Bible Online

Psalm 147 - Pennsylvania German bible

Psalm 147

¹Halleluja! 'Sis goot fa lohb singa zu unsah Gott, 'sis leeblich un recht fa een preisa.

²Da HAH baut Jerusalem uf un bringd di fashtroida funn Israel zammah.

³Eah hayld selli es fabrochani hatza henn, un bind iahra vayyi blakka uf.

⁴Eah zayld di shtanna, un naymd si awl bei nohma.

⁵Unsah Hah is grohs un mechtich; sei eisicht is unbegreiflich.

⁶Da HAH haybt di nunnah-gedreddana uf un shtohst di gottlohsa uf da bodda.

⁷Singet zumm HAH un seind dankboah; lohvet unsah Gott mitt harfa.

⁸Eah dekt di himla zu mitt volka; eah gebt reyyah uf di eaht, un macht's graws vaxa uf di hivla.

⁹Eah gebt foodah zumm fee, un zu di yunga grabba vann si roofa.

¹⁰Eah is nett uf gnumma mitt di graft funn en gaul, adda mitt di shteika bay funn en mann,

¹¹avvah eah hott blesiah in selli es een firchta, in selli es iahra hofning in sei shtandhaftichi-leevi doon.

¹²Lohb da HAH, oh Jerusalem! Lohb dei Gott, oh Zion!

¹³Eah macht di rikkel funn dei doahra shteik, un saykend dei kinnah es in diah sinn.

¹⁴Eah hald fridda inseit deim land, un macht dich satt mitt em beshta vaytza.

¹⁵Eah shikt sei gebott uf di eaht, un sei vatt gayt shnell rumm.

¹⁶Eah gebt shnay vi vull, un shtroit reifa vi esh.

¹⁷Eah shmeist shlohsa es vi brokka; veah kann fannich sei keld shtay?

¹⁸Eah shikt sei vatt naus, un's ice fashmelst; eah macht sei vind blohsa, un's vassah lawft.

¹⁹Eah fakindicht sei vatt zumm Jakob, sei gebodda un adnunga zu Israel.

²⁰Eah hott dess nett gedu fa ennichi anri leit; si vissa sei gebodda nett. Halleluja!