Read Pennsylvania German Psalm 148 Bible Online

Psalm 148 - Pennsylvania German bible

Psalm 148

¹Halleluja! Lohvet da HAH funn di himla, lohvet een funn in di hay!

²Lohvet een, awl sei engel, lohvet een, awl sei himlishi greeks-gnechta!

³Lohvet een, sunn un moon, lohvet een, awl shtanna mitt helling!

⁴Lohvet een, diah haychshti himla, un diah vassahra ovvich di himla!

⁵Loss si Gott sei nohma preisa, fa eah hott's gebott gevva, no voahra si kshaffa.

⁶Eah hott si in iahra blatz gedu fa'immah un immah. Eah hott en adning gevva es immah shtay bleibt.

⁷Lohvet da HAH uf di eaht, diah valfish un alles deefes,

⁸aw feiyah, shlohsa, shnay un volka, shtoahmichah vind es dutt vi eah sawkt,

⁹diah berga un awl di hivla, obsht-baym un awl di cedars,

¹⁰aw diahra un awl's fee, glenni diahra es gradla un fekkel es fleeya,

¹¹diah kaynicha funn di eaht un alli mensha, diah evvahshti un alli richtah uf di eaht,

¹²un diah yungi mennah un yungi mayt, aldi leit un kinnah.

¹³Loss si da nohma fumm HAH lohva, fa sei nohma laynich is uf kohva; sei hallichkeit is ovvich di eaht un em himmel.

¹⁴Eah hott sei leit shteik gmacht, so es awl sei saylichi een lohva sella, di Kinnah-Israel, dee es eem leeb sinn. Halleluja!