Read Pennsylvania German Psalm 17 Bible Online

Psalm 17 - Pennsylvania German bible

Psalm 17

¹En gebayt fumm Dawfit. Heich mich ab, oh HAH, heich vann ich roof. Dray dei oah zu meim gebayt, es nett kumd funn uneahlichi leftz.

²Loss mei gericht kumma funn diah; dei awwa sayna vass recht is.

³Du hosht mei hatz ausbroviaht; du bisht zu miah kumma deich di nacht; du hosht mich broviaht un hosht nix kfunna. Ich habb ausgmacht es mei maul zayld nett sindicha.

⁴So veit es di verka funn mensha oh gayn, havvich kenn evil gedu mitt gvald, bei's vatt funn dei leftz halda.

⁵Hald mei fees uf dei pawda, so es mei fees nett shlibba.

⁶Ich habb groofa zu diah, oh Gott, fa du gebsht miah andvat, dray dei oah zu miah un heich mei vadda oh.

⁷Veis dei shtandhaftichi grohsi leevi, du Heiland vo selli saylich machsht mitt dei rechtsi hand es zu diah shpringa, vekk funn iahra feinda.

⁸Hald mich es da abbel funn dei awk, fashtekkel mich im shadda funn dei flikkel.

⁹Hald mich funn di gottlohsa es mich nunnah dredda, un funn mei maddahrei feinda es um mich rumm kumma.

¹⁰Si henn iahra haddi hatza zu gmacht; iahra meilah shvetza shtolsi vadda.

¹¹Si henn uns umringd vo-evvah es miah sinn; si henn iahra awwa ksetzt fa uns uf da bodda shmeisa.

¹²Si sinn vi en layb es fareisa vill, vi en yungah layb am voahra im shadda.

¹³Shtay uf, oh HAH, shtell dich fannich si un bring si nunnah, dray mich lohs funn di gottlohsa mitt dei shvatt.

¹⁴Mitt dei hand, oh HAH, hald mich funn sohwichi mennah; funn veldlichi mennah es iahra dayl greeya in demm layva. Du filsht iahra bauch mitt vass du ufkshtoaht hosht fa si; un gebsht iahra kinnah aw genunk, un losht samm ivvahrich fa iahra kinds-kinnah.

¹⁵Avvah fa mich, ich in mei gerechtichkeit zayl dei ksicht sayna, un zayl zufridda sei fa dei gleichnis sayna vann ich uf vekk.