Read Pennsylvania German Psalm 18 Bible Online

Psalm 18 - Pennsylvania German bible

Psalm 18

¹En Psalm fumm Dawfit, em HAH sei gnecht, zumm foah-singah. Eah hott dee vadda ksunga vo da HAH een frei gmacht hott funn awl sei feinda un fumm Saul. Eah hott ksawt: Ich habb dich hatzlich leeb, oh HAH, mei Graft.

²Da HAH is vi en felsa un en shteik greeks-haus zu miah. Eah macht mich frei. Mei Gott is vi en felsa es ich hinna droh shtay kann unni kfoah. Eah is mei shield un's greftich hann funn mei saylichkeit, mei shteikah helfah.

³Ich roof zumm HAH, deah vo's veaht is fa glohbt sei, no vatt ich frei funn mei feinda.

⁴Di shtrikk fumm doht voahra gans um mich rumm, un di vella funn ungettlichkeit sinn ivvah mich grold.

⁵Di shtrikk fumm grawb sinn um mich rumm gvest, un da doht hott sei fall ksetzt katt fa mich.

⁶In meim angsht habb ich zumm HAH groofa; ich habb naus groofa zu meim Gott fa hilf. Funn sei tempel hott eah mei shtimm keaht; eah hott abkeicht zu meim roof fa hilf.

⁷Di eaht hott kshiddeld un kshokkeld, unnich di berga voah's am shidla, 's voah am shidla veil eah bays voah.

⁸Shmohk is aus sei naws kumma; feiyah es sacha ufbrend is aus seim maul kumma, un flamm funn di kohla is funn eem kumma.

⁹Eah hott di himla uf gmacht, un is runnah kumma, dikki volka voahra unnich sei fees.

¹⁰Eah hott en cherub mitt flikkel gridda un is kflowwa, eah is kflowwa uf di flikkel fumm vind.

¹¹Eah hott sich fashtekkeld im dunkla, un hott sich zu gedekt mitt dikki reyyah volka.

¹²Di helling fannich eem hott di volka vekk grold; shlohsa un kohla mitt feiyah sinn raus kumma.

¹³Da HAH hott gedimmeld fumm himmel, un em Alli-Haychshta sei shtimm hott kshald mitt shlohsa un gviddah.

¹⁴Eah hott arrows kshossa un hott sei feinda ausnannah kshtroit, mitt grohsi gviddah-shtrawla hott eah si raus gyawkt.

¹⁵Di grawva fumm say henn sich gvissa, un da bodda funn di eaht voah abgedekt, vo du ksholda hosht, oh HAH, vo du kshnauft un geblohsa hosht in deim zann.

¹⁶Eah hott runnah glangd funn ovva-heah un hott hohld gnumma funn miah; eah hott mich ruff gezowwa aus em deefa vassah.

¹⁷Eah hott mich frei ksetzt funn mei shteiki feinda un selli es mich kast henn, veil si zu shteik voahra fa mich.

¹⁸Si sinn uf mich lohs kumma vo ich in druvvel voah, avvah da HAH hott bei miah kshtanna.

¹⁹Eah hott mich raus kfiaht in en sayfah blatz, un hott mich frei ksetzt, veil ich eem kfellich voah.

²⁰Noch mei gerechtichkeit, so gebt da HAH miah zrikk; veil mei hend sauvah voahra, hott eah mich zrikk betzawld.

²¹Ich habb da vayk fumm HAH kalda, un habb nett letz gedu bei vekk drayya fumm meim Gott.

²²Sei gans ksetz voah fannich miah, un ich habb nett vekk gedrayt funn sei gebodda.

²³Ich voah unshuldich fannich eem, un habb mich kalda funn sindicha.

²⁴Da HAH hott mich zrikk betzawld fa mei gerechtichkeit, veil mei hend sauvah voahra in sei awwa.

²⁵Geyyich di heilicha bisht du heilich, un geyyich di unshuldicha bisht du unshuldich.

²⁶Geyyich selli vo rein sinn bisht du aw rein, un geyyich di veeshta bisht du shlichtich.

²⁷Du helfsht leit es daymeedich sinn, avvah di shtolsa bringsht du nunnah.

²⁸Du machsht mei licht sheina, da HAH, mei Gott, macht mei dunkelheit dawk sei.

²⁹Mitt diah kann ich uf en drubb greeks-leit lohs gay, un mitt meim Gott kann ich ivvah en vand tshumba.

³⁰Gott sei vayya sinn gans folkumma; em HAH sei vadda sinn voah. Eah is en shield fa awl selli es eem drauwa.

³¹Fa veah is Gott, vann nett da HAH? Un veah is en Felsa, vann nett unsah Gott?

³²Es is Gott es mich shteik macht, eah macht mei vayk grawt.

³³Eah macht mei fees vi hasha fees, un lost mich in hohchi bletz shtay.

³⁴Eah land mich fa fechta im greek, so es mei eahm en eisichah bow zeeya kenna.

³⁵Du gebsht miah da shield funn dei saylichkeit, dei rechtsi hand haybt mich uf; un dei bamhatzichi hilf macht mich grohs.

³⁶Du hosht en braydi pawt gmacht fa druff lawfa, so es mei fees nett shlibba.

³⁷Ich binn mei feinda nohch ganga un binn eena nohch kumma; ich binn nett zrikk gedrayt biss si umgebrocht voahra.

³⁸Ich habb si faglobt biss si nimmi uf shtay henn kenna; si sinn unnich mei fees kfalla.

³⁹Du hosht mich shteik gmacht fa fechta im greek, selli es geyyich mich voahra hosht du gmacht sich bikka fannich miah.

⁴⁰Du hosht mei feinda gmacht iahra bikkel geyyich mich drayya; ich habb selli umgebrocht es mich hassa.

⁴¹Si henn groofa fa hilf, avvah's voah nimmand fa eena helfa; si henn zumm HAH groofa, avvah eah hott kenn andvat gevva.

⁴²Ich habb si fashlauwa vi feinah shtawb im vind, ich habb si ausgleaht vi drekk in di shtrohsa.

⁴³Du hosht mich aus em shtreit funn di leit gnumma; du hosht mich da eahsht gmacht ivvah di heida; leit es ich nett gekend habb sinn unnich miah.

⁴⁴So kshvind es si mich heahra, heicha si miah, fremdi missa miah heicha.

⁴⁵Si doon awl moot faliahra, si kumma am ziddahra funn iahra shteiki-bletz.

⁴⁶Da HAH laybt! Glohbt is eah, mei Felsa! Gott mei Heiland soll hohch uf kohva sei!

⁴⁷Eah is da Gott es es zrikk betzawles dutt fa mich, eah macht leit unnich mich sei,

⁴⁸eah macht mich frei funn mei feinda. Du hosht mich uf kohva ovvich mei feinda, du machsht mich frei funn unfashtendichi mennah.

⁴⁹Fasell gevvich dank zu diah unnich di heida, oh HAH, un lohb dei nohma mitt singa.

⁵⁰Eah helft em kaynich so es eah sei feinda ivvah-kumd; eah gebt shtandhaftichi-leevi zu sellah es eah ksalbt hott, zumm Dawfit un sei nohch-kummashaft fa'immah.