Read Pennsylvania German Psalm 19 Bible Online

Psalm 19 - Pennsylvania German bible

Psalm 19

¹En Psalm fumm Dawfit. Zumm foah-singah. Di himla sawwa veyyich di hallichkeit funn Gott; un iahra grohsi himmel-shpann veist vass sei hend kshaffa henn.

²Dawk noch dawk fazayla si dess, un nacht noch nacht gevva si eisicht.

³Si henn kenn vadda adda shprohcha, si braucha nett shvetza fa keaht sei.

⁴Doch, iahra shtimm gayt naus ivvah di gans eaht; un iahra vadda biss an's end funn di veld. In di himla hott eah en tent ufksetzt fa di sunn;

⁵see is vi en hochtzich-mann am aus sei shtubb kumma, un sich froit vi en shteikah mann am en race shpringa.

⁶See kumd uf an aym end funn di himla, un bleibt in iahra pawt biss an's annah end. Nix kann sich fashtekla funn iahra hitz.

⁷Es Ksetz fumm HAH is folkumma, un gebt nei layva zu di sayl. Es zeiknis fumm HAH kann gedraut sei, un gebt veisheit zu selli es nett fashtayn.

⁸Em HAH sei befayla sinn recht, un macha's hatz froh. Di gebodda fumm HAH sinn pyuah, un gevva licht zu di awwa.

⁹Di furcht fumm HAH is rein, un bleibt fa'immah. Di gerichta fumm HAH sinn voah, un sinn gans gerecht.

¹⁰Si sinn may veaht es gold, even's feinsht gold. Si sinn seesah es hunnich, even pyuahrah hunnich.

¹¹Un deich si, dutt dei gnecht gvand vadda, veah si halda dutt, hott en grohsah lohn.

¹²Veah kann sei aykni faylah sayna? Fagebb miah di sinda es fashtekkeld sinn zu miah.

¹³Hald dei gnecht funn moot-villichi sinda, loss mei sinda nett roola ivvah mich. No zayl ich unshuldich sei, un frei sei funn grohsi sinda.

¹⁴Loss di vadda funn mei maul, un di gedanka funn mei hatz, diah kfellich sei, oh HAH, mei Felsa un mei Frei-Shtellah.