Read Pennsylvania German Psalm 20 Bible Online

Psalm 20 - Pennsylvania German bible

Psalm 20

¹En Psalm fumm Dawfit. Zumm foah-singah. Ich vinsh es da HAH diah andvat gebt an di zeit funn druvvel; un es da nohma fumm Jakob sei Gott acht gebt uf dich;

²es eah diah hilf shikt fumm heilicha-blatz, un shtayt diah bei funn Zion;

³es eah denkt an dei shpeis-opfahra, un es dei brand-opfahra eem kfellich sinn; (Sela)

⁴es eah diah gebt vass dei hatz havva vill, un shaft alles aus es du im sinn hosht fa du.

⁵Miah singa mitt frayt vann eah diah hilf gebt, un im nohma funn unsah Gott hayva miah unsah flag uf. Ich vinsh es da HAH diah alles gebt es du frohksht difoah.

⁶Nau vays ich es da HAH hilf gebt zu sellah es eah ksalbt hott; eah gebt eem andvat funn sei heilichah himmel. Eah helft eem mitt di graft funn sei rechtsi hand.

⁷Dayl doon iahra fadrauwa in greeks-veyya, un dayl in geil, avvah miah doon unsah fadrauwa in da nohma fumm HAH unsah Gott.

⁸Si sinn niddah gebrocht vadda un sinn kfalla, avvah miah sinn ufkshtanna un shtayn grawt.

⁹Oh HAH, helf em kaynich; gebb uns andvat vann miah roofa.