Read Pennsylvania German Psalm 21 Bible Online

Psalm 21 - Pennsylvania German bible

Psalm 21

¹En Psalm fumm Dawfit. Zumm foah-singah. Oh HAH, da kaynich froit sich in dei graft; eah is oahrich froh fa dei hilf.

²Du hosht eem gevva vass sei hatz falanga hott, un hosht nett kalda funn eem vass sei leftz kfrohkt henn. (Sela)

³Du hosht een ohgedroffa mitt goodi sayya, un hosht en krohn funn fei gold uf sei kobb ksetzt.

⁴Eah hott dich kfrohkt fa layva, un du hosht eem's gevva, en lang layva, fa'immah un immah.

⁵Sei hallichkeit is grohs deich dei hilf, du hosht eem hohchi kaynich-eah gevva.

⁶Du hosht eem ayvichlich sayya gevva, du hosht een froh gmacht veil du bei eem voahsht.

⁷Da kaynich dutt sei fadrauwa in da HAH, un deich di bamhatzich leevi fumm Alli-Haychshta shtayt eah shtandhaftich.

⁸Dei hand zayld awl dei feinda finna; dei rechtsi hand zayld alli-ebbah finna es dich hast.

⁹Du machsht si vi en feiyahrichah offa vann du dich moll veisht. In seim zann zayld da HAH si ufshlukka; un feiyah brend si uf.

¹⁰Du zaylsht iahra nohch-kummashaft vekk butza funn di eaht, un iahra kinnah funn mensha.

¹¹Si henn im sinn fa evil du geyyich dich, un henn en shkeem ufkokt, avvah's zayld nett shaffa.

¹²Du machsht si iahra bikkel drayya, vann du dei gezowwanah bow zeelsht an iahra ksichtah.

¹³Hayb dich hohch uf, oh HAH, in dei graft, miah zayla singa un dei macht lohva.