Read Pennsylvania German Psalm 22 Bible Online

Psalm 22 - Pennsylvania German bible

Psalm 22

¹En Psalm fumm Dawfit. Zumm foah-singah. Mei Gott, mei Gott, favass hosht du mich falossa? Favass bleibsht du so veit vekk mitt dei hilf? Un favass fa'achtsht du di vadda es ich am yammahra binn?

²Oh mei Gott, ich roof deich da dawk, avvah du gebsht kenn andvat, un deich di nacht, avvah ich finn kenn roo.

³Du bisht heilich uf em kaynich-shtool, un Israel lohbt dich.

⁴Unsah feddah henn iahra fadrauwes in dich gedu, si henn in dich geglawbt un du hosht si frei ksetzt.

⁵Si henn zu diah groofa un voahra frei gmacht; si henn in dich geglawbt un voahra nett nunnah glost.

⁶Avvah ich binn en voahm, nett en mensh, leit fashpodda mich, si gukka nunnah uf mich.

⁷Alli-ebbah es mich saynd dutt shpodda, si macha iahra maul uf, shidla da kobb un sawwa:

⁸“Eah hott sich falossa uf da HAH; loss da HAH kumma een hohla. Loss da HAH kumma een frei macha, siddah es eah em HAH kfellich voah.”

⁹Avvah doch du hosht mich aus mei muddah iahra leib gnumma; du hosht miah en fadrauwa gevva in dich, vo ich an mei muddah iahra brusht voah.

¹⁰Ich habb mich falossa uf dich fumm dawk es ich geboahra voah, funn mei muddahs-leib voahsht du mei Gott.

¹¹Bleib nett veit vekk funn miah, fa druvvel is nayksht, un's is nimmand fa helfa.

¹²Si sinn um mich rumm vi feel bulla, si henn mich umgringd vi shteiki bulla fumm land Basan.

¹³Si macha iahra meilah grohs uf geyyich mich, so vi en rawsichah layb.

¹⁴Ich binn raus gleaht vi vassah; awl mei gnocha sinn funn-nannah gezowwa, mei hatz is vi fashmolsanah wax in miah.

¹⁵Mei grefta sinn ufgedrikkeld vi en shtikk fabrocha ksha; mei zung shtekt zu mei gummah in meim maul, un du layksht mich in da shtawb fumm doht.

¹⁶Di hund sinn um mich rumm, gottlohsi leit henn mich umringd. Si henn mei hend un fees deich kshtocha.

¹⁷Ich kann awl mei gnocha zayla, leit gukka an mich un vatsha mich.

¹⁸Si fadayla mei glaydah unnich nannah, si zeeya's lohs fa mei rokk.

¹⁹Avvah du, oh HAH, bleib nett veit vekk funn miah, oh du, mei Graft, kumm kshvind un helf miah.

²⁰Hald mei sayl aus di kfoah fumm shvatt, hald mei layva funn di graft funn dee hund.

²¹Helf miah vekk funn dee layva iahra meilah, hald mich aus di kfoah funn dee vildi oxa iahra hanna.

²²Ich zayl shvetza veyyich dei nohma zu mei breedah, un dich lohva in di mitt funn di fasamling.

²³Diah es di furcht fumm HAH hend, lohvet een; awl diah, di nohch-kummashaft fumm Jakob, eahret een, un diah, di nohch-kummashaft funn Israel, gukket nuff zu eem.

²⁴Eah hott sellah nett fa'acht un nunnah gedrayt, es am leida un deich macha is. Eah hott sei ksicht nett fashtekkeld funn eem, avvah eah hott's keaht vo eah groofa hott zu eem.

²⁵Ich vill dich lohva in di grohs fasamling, ich vill du vass ich fashprocha habb fannich selli es dich firchta.

²⁶Selli es leida, sella essa un satt sei; selli es da HAH sucha zayla een lohva. Eiyah hatza sella ayvichlich layva.

²⁷Alli-ebbah zayld droh denka un zumm HAH drayya biss an's end funn di eaht. Awl di kshlechtah funn di heida zayla sich nunnah bikka fannich eem.

²⁸Fa's Kaynich-Reich heaht zumm HAH, eah roold ivvah di leit funn di veld.

²⁹Awl di reicha funn di eaht zayla essa un een ohbayda. Awl selli es shlohfa in di eaht zayla's gnee beeya fannich eem. Nimmand kann sei aykni sayl levendich halda.

³⁰Di nohch-kummashaft zayld een deena, selli es noch nett geboahra sinn, zayla ksawt sei veyyich em Hah.

³¹Si zayla sei gerechtichkeit breddicha zu leit es noch nett geboahra sinn, un zayla sawwa vass da Hah gedu hott.