Read Pennsylvania German Psalm 24 Bible Online

Psalm 24 - Pennsylvania German bible

Psalm 24

¹En Psalm fumm Dawfit. Di eaht is em HAH seini, un alles es drinn is. Di veld un awl selli es drinn voona sinn sei.

²Eah hott di eaht gegrund uf em deef vassah fumm say, un hott si uf di revvahra ksetzt.

³Veah dauf uf em HAH sei hivvel gay? Veah dauf in seim heilicha-blatz shtay?

⁴Deah es unshuldichi hend un en rein hatz hott; deah es sei sayl nett ivvah-gebt zu falshheit, un uneahlich shveaht.

⁵Eah zayld en sayya greeya fumm HAH, un da Gott funn sei saylichkeit gebt eem gerechtichkeit.

⁶So sinn selli leit es een sucha, selli es sucha fa's ksicht fumm Jakob sei Gott. (Sela)

⁷Hayvet eiyah kebb uf, diah doahra, seind uf kohva, diah doahra funn lang zrikk, so es da Kaynich funn hallichkeit rei kumma kann.

⁸Veah is da Kaynich funn hallichkeit? Es is da HAH, shteik un mechtich, da HAH mechtich im greek.

⁹Hayvet eiyah kebb uf, diah doahra; hayvet si uf, diah doahra funn lang zrikk, so es da Kaynich funn hallichkeit rei kumma kann.

¹⁰Veah is deah Kaynich funn hallichkeit? Da HAH Awlmechtich— eah is da Kaynich funn hallichkeit. (Sela)