Read Pennsylvania German Psalm 25 Bible Online

Psalm 25 - Pennsylvania German bible

Psalm 25

¹En Psalm fumm Dawfit. Zu diah, oh HAH, hayvich mei sayl uf.

²Oh mei Gott, ich du mei fadrauwa in dich, loss mich nett zumm shohm gebrocht sei, un loss mei feinda sich nett froiya ivvah mich.

³Selli es iahra hofning in dich doon, zayla nee nett zumm shohm gebrocht sei. Avvah selli es geyyich dich shaffa unni uahsach, zayla sich shemma.

⁴Veis miah dei vayya, oh HAH, un lann mich fa dei pawda nohch gay.

⁵Fiah mich in dei voahheit un lann mich, fa du bisht da Gott funn mei saylichkeit; mei hofning is in diah da gans dawk.

⁶Denk an dei bamhatzichkeit un dei shtandhaftichi-leevi, oh HAH, fa du hosht si shund katt lang zrikk.

⁷Denk nett an di sinda funn mei yungi dawwa, un aw nett vi ich geyyich dich kshaft habb. Denk an mich deich dei bamhatzichkeit, oh HAH, veil du goot bisht.

⁸Da HAH is goot un gerecht, fasell veist eah di sindah sei vayk.

⁹Eah fiaht di daymeedicha in vass recht is, un land eena sei vayk.

¹⁰Awl di vayya fumm HAH sinn oahrich goot un shtandhaftich, zu selli es sei bund un gebodda halda.

¹¹Fa da sayk funn dei nohma, oh HAH, fagebb mei sinda, fa si sinn feel.

¹²Veah is da mann es di furcht Gottes hott? Eah veist sellem mann da vayk es eah gay soll.

¹³Da HAH saykend een mitt en goot layva, sei nohch-kummashaft zayld's land eahva.

¹⁴Da HAH is da freind funn selli es een firchta; eah veist sei bund zu eena.

¹⁵Mei awwa sinn immah uf'm HAH, un eah zeekt mei fees aus di fall.

¹⁶Dray dich zu miah, un sei gnaydich zu miah, fa ich binn laynich un fafolkt.

¹⁷Da angsht in mei hatz is grohs, fiah mich aus dee dreebsawl.

¹⁸Gukk an mei angsht un druvvel, un fagebb awl mei sinda.

¹⁹Gukk an mei feinda es feel sinn; si hassa mich mitt en grohsah hass.

²⁰Hald mich aus di kfoah un mach mich frei, loss mich nett fashohmd vadda, fa ich du mei fadrauwa in dich.

²¹Loss unshuld un ufrichtichkeit mich heeda, veil mei hofning in diah is.

²²Mach Israel frei, oh Gott, funn awl sei druvvel.