Read Pennsylvania German Psalm 27 Bible Online

Psalm 27 - Pennsylvania German bible

Psalm 27

¹En Psalm fumm Dawfit. Da HAH is mei licht un mei saylichkeit; funn vemm soll ich mich feicha? Da HAH is di Graft funn mei layva; veah brauch ich mich feicha diveyya?

²Vann evil-shaffah uf mich kumma fa mich fareisa, vann mei feinda un selli es mich hassa, geyyich mich kumma, dann zayla si shtolbahra un anna falla.

³Even vann feel greeks-gnechta um mich rumm kumma, dann zayld mei hatz sich nett feicha; un vann greek raus brecht geyyich mich, dann faloss ich mich uf een.

⁴Ay ding habb ich kfrohkt fumm HAH, sell zayl ich nohch gay: so es ich im HAH sei haus bleiva kann mei layva lang, fa sayna vi shay es da HAH is, un fa een sucha in seim tempel.

⁵An di zeit funn druvvel, hald eah mich aus di kfoah in seim gebei. Eah fashtekkeld mich in seim tent, un setzt mich uf en hohchah felsa.

⁶No zayld mei kobb uf kohva sei, ivvah mei feinda es um mich rumm sinn. In seim tempel-tent doon ich lohb opfahra mitt frayt, ich zayl singa un da HAH lohva mitt mei shtimm.

⁷Heich mei shtimm oh vann ich roof, oh HAH, sei bamhatzich un gebb miah andvat.

⁸Vo du ksawt hosht, “Such fa mei ksicht,” hott mei hatz ksawt, “Dei ksicht, oh HAH, zayl ich sucha.”

⁹Fashtekkel dei ksicht nett funn miah, dray dei gnecht nett vekk in zann; du es mei hilf voahsht. Faloss mich nett, un loss mich nett hokka, oh Gott funn mei saylichkeit.

¹⁰Even vann mei daett un maemm mich falossa doon, dann nemd da HAH mich uf.

¹¹Veis miah dei vayk, oh HAH, fiah mich in en grawdi pawt, veil ich feel feinda habb.

¹²Du mich nett ivvah-drayya zumm villa funn mei feinda, fa leit es falshi zeiyah sinn, sinn ufkshtanna geyyich mich, un si doon miah shawda.

¹³Ich glawb avvah doch es ich sayna zayl vi goot es da HAH is im land funn di levendicha.

¹⁴Voaht uf da HAH, sei shteik un gedrohsht, ich sawk viddah, voaht uf da HAH.