Read Pennsylvania German Psalm 3 Bible Online

Psalm 3 - Pennsylvania German bible

Psalm 3

¹En Psalm fumm Dawfit vo eah vekk kshprunga is funn sei boo da Absalom. Oh HAH, vi feel sinn selli es mich hassa! Vi feel sinn selli es ufshtayn geyyich mich!

²Feel sawwa veyyich miah, “Gott zayld eem nett helfa.” (Sela)

³Avvah du bisht en shield um mich rumm, oh HAH, du gebsht miah eah un haybsht mei kobb uf.

⁴Ich roof zumm HAH mitt mei shtimm, un eah heaht mich funn seim heilicha hivvel. (Sela)

⁵Ich layk mich anna fa shlohfa; ich vekk viddah uf veil da HAH mich sayf hald.

⁶Ich feich mich nett veyyich feel dausends, es sich geyyich mich ksetzt henn uf alli seit.

⁷Shtay uf, oh HAH! Helf miah, oh mei Gott! Fa du shlaksht awl mei feinda uf da bakka; du fabrechsht di zay funn di ungettlicha.

⁸Di hilf kumd fumm HAH. Loss dei sayya uf dei leit kumma. (Sela)