Read Pennsylvania German Psalm 32 Bible Online

Psalm 32 - Pennsylvania German bible

Psalm 32

¹En lanning fumm Dawfit. Ksaykend is sellah es sei ivvah-dreddes fagevva grikt hott, sellah es sei sinda zu gedekt grikt hott.

²Ksaykend is da mensh, es sei sinda nett geyyich sich kohva grikt beim HAH, un es en geisht hott unni falshheit.

³Vo ich shtill voah veyyich mei sinda, sinn mei gnocha shiah ausgvoahra deich mei geyammah da gans dawk lang.

⁴Dawk un nacht voah dei hand shveah uf miah, mei graft voah ufgedrikkeld, vi in di hitz fumm summah. (Sela)

⁵No habb ich mei sinda bekend zu diah, un habb mei shulda nett zu gedekt. Ich habb ksawt, “Ich bekenn mei ivvah-dreddes zumm HAH,” un du hosht di shuld funn mei sinda vekk gnumma. (Sela)

⁶Fasell loss alli-ebbah es gettlich is bayda zu diah, diveil es du kfunna sei kansht; no vann hohchi vassahra kumma, langa si nett nuff zu eem.

⁷Mitt diah kann ich mich fashtekla; du haldsht mich aus di kfoah funn druvvel; du umringsht mich mitt selli es laut singa veil ich frei ksetzt binn. (Sela)

⁸Ich lann dich un veis diah da vayk es du gay solsht; ich gebb diah roht, un vatsh ivvah dich.

⁹Seind nett vi da gaul un da aysel, dee es sinn unni fashtand; dee muss ma en zohm un gebiss ohdu, adda si kumma nett zu diah.

¹⁰Di gottlohsa henn feel druvvel, avvah bamhatzichkeit umringd sellah es sei fadrauwes in da HAH dutt.

¹¹Froiyet eich ivvah da HAH, un seind fraylich diah gerechti; un singet mitt frayt, diah es ufrichtichi hatza hend.