Read Pennsylvania German Psalm 33 Bible Online

Psalm 33 - Pennsylvania German bible

Psalm 33

¹Singet mitt frayt zumm HAH, diah gerechti, es is shiklich es di ufrichticha een preisa.

²Danket da HAH mitt harfa, singet lohb zu eem mitt zeyya kshtringdi harfa.

³Singet en nei leet zu eem; shpeelet shay un greishet naus mitt frayt.

⁴Fa's vatt fumm HAH is ufrichtich un voah, un eah is shtandhaftich in alles es eah dutt.

⁵Eah leebt gerechtichkeit un vass recht is; di eaht is foll mitt di shtandhaftich leevi fumm HAH.

⁶Da himmel voah gmacht bei's vatt fumm HAH, un alles es drinn is bei da ohften funn seim maul.

⁷Eah sammeld di vassahra fumm say zammah vi in en boddel; eah shtoaht's vassah fumm say in shtoah-heisah.

⁸Loss di gans eaht da HAH firchta; loss awl di leit in di veld een hohch achta.

⁹Fa eah hott kshvetzt, no voah's so kshaffa; eah hott gebodda gevva, un's hott so auskshaft.

¹⁰Da HAH macht da roht funn di heida zu nix kumma, un fadaubt vass di leit im sinn henn fa du.

¹¹Da roht fumm HAH shtayt fa'immah, un di gedanka funn seim hatz ayvichlich.

¹²Ksaykend sinn di leit es da HAH iahra Gott macha, di leit es eah groofa hott fa sei eahbshaft sei.

¹³Da HAH gukt runnah fumm himmel, un saynd awl di kinnah funn mensha.

¹⁴Funn seim kaynich-shtool gukt eah naus, un saynd alli-ebbah uf di eaht.

¹⁵Eah macht awl iahra hatza, un eah fashtayt alles es si doon.

¹⁶En kaynich vatt nett aus di kfoah kalda deich sei feel greeks-gnechta; en greeks-gnecht hald sich nett frei bei sei grohsi graft.

¹⁷En gaul is en falshi hofning im greek, eah kann nimmand frei macha mitt sei grohsi graft.

¹⁸Di awwa fumm HAH sinn uf selli es een firchta, uf selli es iahra hofning in sei shtandhaftichi-leevi doon,

¹⁹so es eah iahra sayl fumm doht halda kann, un si am layva halda kann deich di hungahs-noht.

²⁰Unsah sayl voaht uf da HAH; eah is unsah hilf un shield.

²¹Unsah hatz froit sich deich een, veil miah drauwa in sei heilichah nohma.

²²Loss dei shtandhaftichi-leevi uf uns sei, oh HAH, vi miah unsah hofning in dich doon.