Read Pennsylvania German Psalm 34 Bible Online

Psalm 34 - Pennsylvania German bible

Psalm 34

¹En Psalm fumm Dawfit vo eah ohglost hott eah veah nett recht fannich em Abimelech, un eah hott een fatt gyawkt. Ich vill da HAH lohva di gans zeit, sei lohb soll immah in meim maul sei.

²Mei sayl zayld braekka veyyich em HAH, so es di daymeedicha dess heahra un sich froiya.

³Preiset da HAH mitt miah, vella sei nohma uf hayva mitt-nannah.

⁴Ich habb da HAH ksucht, un eah hott miah andvat gevva, eah hott mich frei gmacht funn awl mei furcht.

⁵Selli es zu eem gukka sinn froh, iahra ksichtah braucha sich nee nett shemma.

⁶Deah oahm mann hott groofa, un da HAH hott een keaht, un hott een frei gmacht funn awl sei druvvel.

⁷Da engel fumm HAH bleibt um selli rumm es een firchta, un eah macht si frei.

⁸Fasuchet un saynet vi goot es da HAH is, ksaykend is da mann es eem draut an di zeit funn kfoah.

⁹Firchtet da HAH, diah saylichi, selli es een firchta, henn kenn noht.

¹⁰Di yunga layb gayn hungahrich un vadda shvach, avvah selli es da HAH sucha, henn kenn noht fa ennich goot ding.

¹¹Kummet, mei kinnah, heichet mich ab; ich lann eich fa da HAH firchta.

¹²Veah is es es layva vill mitt frayt, un es feel goodi dawwa sayna vill?

¹³Hald dei zung funn evil, un dei leftz funn leeya sawwa.

¹⁴Dray vekk funn evil un du goot, such fridda un gay fridda nohch.

¹⁵Di awwa fumm HAH sinn uf di gerechta, un sei oahra heahra vann si een roofa.

¹⁶'S ksicht fumm HAH is geyyich selli es evil doon, so es si gans fagessa sinn uf di eaht.

¹⁷Di gerechta roofa, un da HAH heaht si, un macht si frei funn awl iahra druvvel.

¹⁸Da HAH is nayksht zu selli es fabrochani hatza henn, un setz selli frei es moot faloahra henn.

¹⁹Da gerecht mann muss feel druvvel leida, avvah da HAH setzt een frei funn si awl;

²⁰da HAH gebt acht uf awl sei gnocha; nett ayns funna zayld fabrocha gay.

²¹Evil bringd da doht zu di gottlohsa, un selli es di gerechta hassa zayla fadamd sei.

²²Da HAH kawft sei gnechta iahra layva frei, un nimmand es eem draut zayld fadamd sei.