Read Pennsylvania German Psalm 36 Bible Online

Psalm 36 - Pennsylvania German bible

Psalm 36

¹Zumm foah-singah. En Psalm fumm Dawfit, em HAH sei gnecht. Di sind shvetzt zu di ungettlicha deef in iahra hatza, es is kenn furcht funn Gott fannich iahra awwa.

²Veil si zu feel denka funn sich selvaht, doon si iahra sinda nett sayna un hassa.

³Di vadda funn iahra maul sinn gottlohs un falsh, si henn kenn veisheit may fa goot du.

⁴Si henn gottlohsi sacha im sinn diveil es si im bett sinn; si gayn naus uf en vayk es nett goot is, un si drayya evil nett nunnah.

⁵Dei shtandhaftichi-leevi, oh HAH, langd nuff in da himmel, un dei voahheit biss nuff an di volka.

⁶Dei gerechtichkeit is vi di berga funn Gott, un dei gericht vi da deef say. Oh HAH, du gebsht acht uf di mensha un's fee.

⁷Vi keshtlich is dei shtandhaftichi-leevi, oh Gott! Di kinnah funn mensha nemma sich aus di kfoah, im shadda funn dei flikkel.

⁸Si essa sich foll mitt di feel goodi sacha funn dei haus; du gebsht eena zu drinka aus da revvah funn dei blesiah.

⁹Fa bei diah is di shpring funn layva; in deim licht sayna miah helling.

¹⁰Hald oh mitt dei shtandhaftichi-leevi zu selli es dich kenna, un mitt dei gerechtichkeit zu selli es ufrichtich sinn im hatz.

¹¹Loss nett da foos funn di shtolsa uf mich dredda, adda di hand funn di gottlohsa mich vekk dreiva.

¹²Datt leiya di evil-shaffah uf em bodda, si voahra nunnah kshmissa un kenna nimmi uf shtay.