Read Pennsylvania German Psalm 37 Bible Online

Psalm 37 - Pennsylvania German bible

Psalm 37

¹En Psalm fumm Dawfit. Sei nett zannich veyyich dee vo evil doon, un sei nett fagunnish ivvah selli es letz doon.

²Fa si doon glei uf-drikla vi graws, vi en greenah shtokk doon si kshvind favelka.

³Du dei fadrauwa in da HAH un du goot, no kansht im land voona un brauchsht dich nett feicha.

⁴Du dei falanga in da HAH, no gebt eah diah vass dei hatz havva vill.

⁵Gebb dei vayk ivvah zumm HAH, drau eem, un eah zayld's du.

⁶Eah macht dei gerechtichkeit sheina vi en licht, un dei gericht vi di middawk sunn.

⁷Sei shtill fannich em HAH, un voaht geduldich uf een. Sei nett bekimmaht vann's goot gayt mitt leit, adda mitt selli es iahra evili sacha ausdrawwa.

⁸Sei nett bays; dray vekk funn deim zann, sei nett bekimmaht, veil's dich yusht zumm evila fiaht.

⁹Fa di gottlohsa vadda abkshnidda, avvah selli es voahra uf da HAH, zayla's land eahva.

¹⁰Noch en glenni zeit, un di gottlohsa sinn nimmi do, even vann du guksht fa si, kenna si nimmi kfunna sei.

¹¹Di daymeedicha zayla's land eahva, un zayla sich froiya mitt en grohsah fridda.

¹²Di gottlohsa shaffa geyyich di gerechta, un beisa iahra zay zammah geyyich si.

¹³Avvah da Hah lacht ivvah di gottlohsa, veil eah saynd es iahra dawk am kumma is.

¹⁴Di gottlohsa zeeya's shvatt raus, un zeeya da bow zrikk, fa di oahma un aylendichi nunnah bringa, un selli shlachta es ufrichtich lawfa.

¹⁵Avvah iahra shvadda shtecha deich iahra aykni hatza, un iahra bows zayla fabrocha gay.

¹⁶Es bissel es di gerechti henn, is bessah es es feel es di gottlohsa henn.

¹⁷Di eahm funn di gottlohsa vadda fabrocha, avvah da HAH haybt di gerechta uf.

¹⁸Da HAH vayst veyyich di dawwa funn di unshuldicha, un iahra eahbshaft bleibt fa'immah.

¹⁹In shlechti zeida braucha si sich nett shemma, an di dawwa funn hungahs-noht henn si blendi.

²⁰Avvah di gottlohsa zayla umkumma: Di feinda fumm HAH zayla sei vi shayni vayt-feldah, si zayla fagay—vi shmohk zayla si fagay.

²¹Da gottlohs laynd un betzawld nett zrikk, avvah da gerecht is goot-maynich un gebt geahn.

²²Selli es ksaykend sinn bei eem, eahva's land, avvah selli es faflucht sinn bei Gott, vadda abkshnidda.

²³En goodah mann sei shritt sinn grawt kalda beim HAH, un sei vayk is eem kfellich.

²⁴Vann eah shtolbaht, dutt eah nett falla, fa da HAH haybt sei hand.

²⁵Ich voah moll yung, un nau binn ich ald, avvah ich habb di gerechta nee nett ksenna falossa sei, adda iahra kinnah am broht bedla.

²⁶Si sinn immah goot-maynich un layna geahn, un iahra kinnah sinn ksaykend.

²⁷Dray fumm evila un du goot, no zaylsht du immah im land voona.

²⁸Da HAH leebt sell vass recht is, un falost nett sei shtandhaftichi. Si vadda aus di kfoah kalda fa'immah, avvah di nohch-kummashaft funn di gottlohsa vadda abkshnidda.

²⁹Di gerechta zayla's land eahva, un drinn voona fa'immah.

³⁰'S maul fumm gerechta mann shvetzt veisheit, un sei zung sawkt vass recht is;

³¹es ksetz funn sei Gott is in seim hatz, un sei fees doon nett shlibba.

³²Da gottlohs mann voaht un vatsht fa da gerecht mann, un broviaht een umbringa.

³³Avvah da HAH lost een nett im gottlohsa sei hand sei, un lost een nett shuldich sei vann eah gricht is.

³⁴Voaht uf da HAH, un hald dich uf seim vayk. No haybt eah dich uf fa's land eahva. Vann di gottlohsa abkshnidda vadda, zaylsht du's sayna.

³⁵Ich habb en gottlohsah mann ksenna es leit nunnah drett, un es sich grohs un brayt gmacht hott vi en greenah bohm,

³⁶ich binn viddah fabei kumma, un eah voah nimmi gvest; ich habb nohch kfrohkt, avvah eah hott nimmi kfunna sei kenna.

³⁷Nemm acht fumm unshuldicha mann, un vatsh sellah es eahlich is. Fa da mann mitt fridda zayld nohch-kummashaft havva.

³⁸Avvah di ivvah-dreddah zayla awl umkumma, un di gottlohsa iahra nohch-kummashaft vatt abkshnidda.

³⁹Di saylichkeit funn di gerechta kumd fumm HAH, eah is iahra grefta an di zeit funn druvvel.

⁴⁰Da HAH helft eena un macht si frei; eah hald si aus di kfoah funn di gottlohsa, veil si sich falossa uf een.