Read Pennsylvania German Psalm 38 Bible Online

Psalm 38 - Pennsylvania German bible

Psalm 38

¹En gebayt fumm Dawfit fa en ohdenkes. Oh HAH, zank mich nett in deim zann, un shtrohf mich nett diveil es du bays bisht.

²Dei arrows shtekka deef in miah, un dei hand drikt mich nunnah.

³Es is nix ksundes in meim leib deich dei zann, un's is kenn fridda in mei gnocha deich mei sinda.

⁴Fa mei sinda gayn ivvah mei kobb; vi en shveahrah lasht, sinn si zu shveah fa mich.

⁵Mei vayyi blakka sinn am fafaula un shtinka, veil ich mich so dumm ohkshikt habb.

⁶Ich binn grumm un ivvah-gebikt, un gay rumm in dreebsawl da gans dawk.

⁷Mei leib is am brenna mitt shmatza, es is nix ksundes in meim flaysh.

⁸Ich binn matt un alles fadrikt; ich yammah veil mei hatz unruich is.

⁹Oh Hah, awl mei falanga sinn gvissa zu diah, un mei hatt shnaufes is nett fashtekkeld funn diah.

¹⁰Mei hatz globt hatt, un mei grefta falossa mich; un even's licht funn mei awwa is ausganga.

¹¹Mei kumrawda un mei freind halda sich vekk funn miah deich mei granket, un mei freindshaft hald sich veit vekk.

¹²Selli es mich doht macha vella, shtella falla fa mich; selli es miah vay du vella shvetza veyyich miah shawda du, un si macha aus da gans dawk vi si mich ohfiahra vella.

¹³Ich binn vi en dawbah mann es nett heahra kann, un vi aynah es nett shvetza kann.

¹⁴Yau, ich binn vi en mann es nett heaht, aynah es nett zrikk shvetza kann mitt seim maul.

¹⁵Ich voaht uf dich, oh HAH; du gebsht andvat, oh Hah mei Gott.

¹⁶Fa ich habb ksawt, “Loss si nett sich froiya ivvah mich; loss si nett sich hohch uf hayva ivvah mich vann mei foos shlibt.”

¹⁷Fa ich binn shiah goah am falla, un mei shmatza sinn immah bei miah.

¹⁸Ich bekenn mei shulda, un binn engshtlich veyyich mei sinda.

¹⁹Mei feinda sinn foll layva un sinn shteik, selli es mich hassa unni uahsach sinn feel.

²⁰Selli is mei goodes zrikk betzawla mitt evil, sinn geyyich mich veil ich goodes nohch gay.

²¹Faloss mich nett, oh HAH, bleib nett veit vekk funn miah, oh mei Gott.

²²Dummel dich un helf miah, oh Hah, mei Saylichkeit.