Read Pennsylvania German Psalm 39 Bible Online

Psalm 39 - Pennsylvania German bible

Psalm 39

¹Zumm foah-singah da Jeduthun. En Psalm fumm Dawfit. Ich habb miah dess foah-gnumma: Ich zayl mei vayya heeda, so es ich nett sindich mitt mei zung. Ich hald mei maul shtill, so lang es di ungettlicha um mich rumm sinn.

²Avvah vo ich nix ksawt habb un shtill voah, un habb even nix goodes ksawt, dann is mei angsht graysah vadda.

³Mei hatz is hays vadda in miah; vi ich drivvah gedenkt habb, hott's feiyah gebrend, so habb ich kshvetzt mitt mei zung.

⁴HAH, veis miah's end funn mei layva, un vi lang es mei dawwa sei zayla, gmohn mich droh vi vennich zeit es noch ivvahrich is.

⁵Gukk moll, mei dawwa sinn yusht vi di brayding funn en hand, un mei layves-zeit vi nix in dei awwa, em mensh sei layva is yusht en ohften! (Sela)

⁶Da mensh lawft rumm heah es vi en shadda, un macht sich unaydichah druvvel, eah sammeld feel geld, un vayst nett veah's greeya zayld.

⁷Avvah nau, oh Hah, vass binn ich am voahra druff, mei hofning is in diah.

⁸Mach mich frei funn awl mei sinda, un loss mich nett en kshpott vadda bei di unksheida.

⁹Ich binn shtill, un mach mei maul nett uf, fa du hosht dess gedu.

¹⁰Nemm dei shtraych funn miah vekk, ich binn am fagay deich di shtraych funn dei hand.

¹¹Du zanksht un shtrohfsht mensha fa iahra sinda, du fazeahsht vass keshtlich is zu eena vi en shawb. Yaydah mensh is goah nix, yusht so vi en ohften. (Sela)

¹²Heich mei gebayt ab, oh HAH, un nemm acht funn meim geroof fa hilf, sei nett dawb vann ich am heila binn. Fa ich binn vi en fremdah bei diah, en fremdah, so vi awl mei foah-feddah voahra.

¹³Gukk vekk funn miah, so es ich mich viddah froiya kann, eb ich vekk gay un nimmi binn.