Read Pennsylvania German Psalm 41 Bible Online

Psalm 41 - Pennsylvania German bible

Psalm 41

¹Zumm foah-singah. En Psalm fumm Dawfit. Ksaykend is sellah es sich bekimmaht veyyich di shvacha; da HAH gebt acht uf een im dawk funn druvvel.

²Da HAH hald een aus di kfoah un hald een levendich; eah saykend een im land, un lost een nett ivvah-gedrayt sei zumm villa funn sei feinda.

³Da HAH gebt acht uf een im bett funn grankheit; in sei grankheit, helfsht du eem viddah zrikk zu di ksundheit.

⁴Ich habb ksawt, “Oh HAH, sei bamhatzich zu miah; hayl mich, fa ich habb ksindicht geyyich dich.”

⁵Mei feinda shvetza evil veyyich miah un sawwa, “Vann zayld eah shtauva un sei nohma fagessa sei?”

⁶Vann si kumma mich sayna, shvetza si falshheit, in iahra hatza sinn si am gukka fa leshtahra; no gayn si naus un fazayles rumm heah.

⁷Awl selli es mich hassa pishbahra zu nannah veyyich miah; si denka di shlimshta sacha veyya miah,

⁸si sawwa, “En ungettlich ding is uf een kumma; eah zayld nee nimmi uf shtay funn vo eah leit.”

⁹Even mei beshtah freind es ich gedraut habb, sellah es funn mei broht gessa hott, is geyyich mich gedrayt, un hott uf mich gedredda mitt sei fees.

¹⁰Avvah du, oh HAH, sei gnaydich zu miah, un helf miah uf, so es ich si zrikk betzawla kann.

¹¹Ich vays es du froh bisht mitt miah, veil mei feind sich nett froiya kann ivvah mich.

¹²Du hosht mich uf kohva veil ich du vass recht is un shtelsht mich ayvichlich fannich dich.

¹³Glohbt sei da HAH, da Gott funn Israel, funn ayvichkeit zu ayvichkeit! Amen un Amen!