Read Pennsylvania German Psalm 44 Bible Online

Psalm 44 - Pennsylvania German bible

Psalm 44

¹En lanning funn di kinnah fumm Korah. Zumm foah-singah. Miah henn keaht mitt unsah oahra, oh Gott, unsah foah-feddah henn uns es fazayld, vass du gedu hosht in iahra zeit, in di alda dawwa.

²Mitt dei aykni hend hosht du di heida ausgedrivva, un hosht unsah foah-feddah eiksetzt. Du hosht selli leit nunnah kshlauwa, avvah dei aykni leit frei gmacht.

³Mitt iahra aykni shvadda henn si's land nett ivvah-gnumma, un iahra ayknah oahm hott eena nett ivvah-hand gevva. Avvah's voah dei rechtsi hand, dei oahm, un's licht funn dei ksicht, veil du si leeb katt hosht.

⁴Du bisht mei Kaynich, oh Gott, un machsht es da Jakob ivvah-hand grikt im greek.

⁵Deich dich sheeva miah unsah feinda zrikk, deich dich dredda miah selli nunnah es geyya uns sinn.

⁶Ich faloss mich nett uf mei bow, un mei shvatt gebt miah nett ivvah-hand.

⁷Avvah du gebsht uns hilf ivvah unsah feinda, un fashohmsht selli es uns hassa.

⁸Miah hayva da nohma funn Gott uf da gans dawk lang, un gevva dank zu eem fa'immah. (Sela)

⁹Avvah doch du hosht uns vekk kshtohsa un fashohmd, un gaysht nimmi mitt uns im greek.

¹⁰Du machsht uns zrikk drayya fannich unsah feinda, un selli es uns hassa nemma unsah sacha vekk.

¹¹Du hosht uns gmacht vi shohf fa kshlacht sei, un hosht uns funn-nannah kshtroit unnich di heida.

¹²Du hosht dei leit fakawft fa shiah nix, un hosht nix raus grikt bei si fakawfa.

¹³Du hosht uns en kshpott gmacht zu unsah nochbahra; si henn uns fashpott un fashohmd zu selli um uns rumm.

¹⁴Du hosht uns en kshvetz gmacht unnich di heida; si shidla iahra kebb un lacha veyyich uns.

¹⁵Ich binn gedaymeedicht da gans dawk, un mei ksicht is zu gedekt mitt shohm,

¹⁶veil ich si heah uns faleshtahra un fashpodda, un unsah feinda sinn am ayva vadda mitt uns.

¹⁷Awl dess is uf uns kumma, avvah miah henn dich nett fagessa, un voahra nett falsh mitt dei bund.

¹⁸Unsah hatza henn nett zrikk gedrayt, un unsah fees sinn nett funn dei pawt ganga.

¹⁹Avvah du hosht uns nunnah kshlauwa un in en blatz funn vildi diahra glost, un hosht uns zu gedekt mitt deefi finshtahnis.

²⁰Vann miah unsah Gott sei nohma fagessa hedda, adda unsah hend naus kshtrekt hedda zu en fremdah gott,

²¹dayt Gott dess nett ausfinna? Fa eah vayst alles es im hatz is.

²²Avvah fa dich sinn miah alli dawk in di kfoah funn doht gmacht sei; miah sinn gnumma vi shohf fa kshlacht sei.

²³Vekk uf, oh Hah! Favass dusht du shlohfa? Shtay uf! Shtohs uns nett vekk fa'immah.

²⁴Favass fashtekkelsht du dei ksicht, un fagesht vi miah am leida un deich macha sinn?

²⁵Unsah sayl is nunnah gebohwa in da shtawb; unsah leib leit uf em grund.

²⁶Shtay uf un helf uns, mach uns frei fa di sayk funn dei grohsi leevi.