Read Pennsylvania German Psalm 45 Bible Online

Psalm 45 - Pennsylvania German bible

Psalm 45

¹En lanning funn di kinnah fumm Korah: En hochtzich leet. Zumm foah-singah. Mei hatz is oahrich froh mitt en goot leet; dess vill ich singa fa da kaynich. Mei zung is vi en penn funn en goodah shreivah.

²Du bisht da shensht unnich di mensha-kinnah; dei leftz sinn ksalbt mitt gnawt, un Gott hott dich ksaykend fa'immah.

³Shnall dei shvatt an dei seit, du Mechtichah, un glayt dich in kaynichi hallichkeit.

⁴In dei hallichkeit foah fassich un nemm ivvah. Fa di sayk funn voahheit, sanftmoot un gerechtichkeit, loss dei rechtsi hand vundahboahri sacha du.

⁵Loss dei shaufi arrows deich di hatza shtecha fumm kaynich sei feinda; loss di heida unnich dei fees falla.

⁶Dei kaynich-shtool, oh Gott, bleibt fa'immah un immah; du saynsht ivvah dei reich in gerechtichkeit.

⁷Du leebsht gerechtichkeit un hasht vass gottlohs is. Fasell hott Gott, dei Gott dich haychah ufketzt es ennich ebbah shunsht, bei dich salba mitt em ayl funn frayt.

⁸Awl dei glaydah sinn goot-shmakkich gmacht mitt myrrhe, aloe un kassia. Fumm ivory-gedekt kaynich-haus, vasht du froh gmacht vann di harfa kshpeeld vadda.

⁹Em kaynich sei mayt sinn gnumma fa selli unnich dei hohch-gachti veibsleit sei, un an dei rechtsi seit shtayt di kaynich-fraw gedekt mitt gold funn Ophir.

¹⁰Heich, oh dochtah, dray dei oah un denk drivvah, fagess dei leit un dei daett sei haus.

¹¹Da kaynich zayld en falanga havva fa dich veil du so shay bisht, eah is dei meishtah, bikk dich zu eem.

¹²'S maydel funn Tyrus zayld kumma mitt en kshenk, reichi leit gukka fa kfellich vadda zu diah.

¹³Gans hallich is di kaynich-dochtah in iahra shtubb, iahra glaydah sinn gmacht mitt goldichah naytz.

¹⁴In ausgnaydi glaydah zayld see zumm kaynich kfiaht sei, iahra hochtzich-mayt kumma iahra nohch, un si vadda zu diah gebrocht.

¹⁵Si vadda nei kfiaht mitt frayt un froiyes, un gayn nei in's kaynich-haus.

¹⁶Dei boova, oh kaynich, zayla da blatz nemma funn dei feddah, du machsht si roolahs ivvah di gans eaht.

¹⁷Ich zayl macha es dei nohma nett fagessa gayt funn kind zu kinds-kind, un fasell zayla leit in anri lendah dich preisa fa'immah un immah.