Read Pennsylvania German Psalm 48 Bible Online

Psalm 48 - Pennsylvania German bible

Psalm 48

¹En psaltah-leet funn di kinnah fumm Korah. Grohs is da HAH, un eah sett hohch gepreist sei, in di shtatt funn unsah Gott, uf sei heilicha hivvel.

²Shay un hohch, un di frayt funn di gans eaht is Zion, da berg funn Gott, di shtatt fumm Grohsa Kaynich.

³Gott is in di shtatt iahra greeks-heisah, un eah hott sich bekand gmacht es en sayfah Roo-Blatz.

⁴Di kaynicha henn sich fasammeld, un sinn mitt-nannah fassich kumma.

⁵Si henn di shtatt ksenna un voahra fashtaund, si voahra engshtlich un sinn difunn.

⁶Si henn geziddaht datt, mitt angsht vi en fraw am en kind havva.

⁷Mitt em east vind, hosht du di shiffah funn Tharsis fabrocha.

⁸Vi miah keaht henn, so henn miah ksenna in di shtatt fumm Awlmechticha HAH, in di shtatt funn unsah Gott. Gott macht di shtatt shtandhaftich shtay fa'immah. (Sela)

⁹In di mitt funn dei tempel, oh Gott, henn miah dei shtandhaftichi-leevi ivvah-gedenkt.

¹⁰Grawt vi dei nohma, oh Gott, so bisht du gepreist biss an's end funn di eaht, dei rechtsi hand is foll mitt gerechtichkeit.

¹¹Loss da Berg funn Zion froh sei, un di dochtahra funn Juda sich froiya, veil dei gericht recht is.

¹²Lawfet um di shtatt Zion rumm, un zaylet iahra tavvahs.

¹³Gukket an iahra vanda, un nemmet acht funn iahra kaynich-heisah, so es diah eiyah nohch-kummashaft dess sawwa kennet.

¹⁴Fa deah Gott is unsah Gott fa'immah; eah fiaht uns biss an's end.