Read Pennsylvania German Psalm 49 Bible Online

Psalm 49 - Pennsylvania German bible

Psalm 49

¹En Psalm funn di kinnah fumm Korah. Zumm foah-singah. Heichet dess ab, awl diah leit, losset alli-ebbah in di gans veld dess heahra,

²awl di niddahra un di hohcha, un aw di reicha un di oahma.

³Mei maul shvetzt veisheit, un vass mei hatz sawkt zayld eisicht gevva.

⁴Ich zayl mei oah drayya zu en shpruch funn veisheit; ich layk fashtekkeld kshvetz aus mitt di harf.

⁵Favass sett ich mich feicha an di zeit funn druvvel, vann gottlohsi feinda um mich rumm sinn—

⁶selli es sich falossa uf iahra geld, un braekka vi reich es si sinn?

⁷Nimmand kann sei broodah frei kawfa, adda Gott betzawla fa een frei macha.

⁸Fa's layva funn en mann is zu deiyah, un eah kend nee nett genunk betzawla difoah,

⁹so es eah on layva kend fa'immah un nett in's grawb gay.

¹⁰Ma kann sayna es even leit mitt veisheit shtauva, di dumma un unkshikta doon aw, un si missa awl iahra geld lossa fa anri.

¹¹Iahra grawb is iahra haymet fa'immah, si voona datt fa'immah, even vann si iahra ayya land gaygend katt henn.

¹²Da mann mitt grohsi eah kann nett do bleiva; eah kumd um grawt vi's fee aw dutt.

¹³Dess is da vayk funn selli es iahra fadrauwa in sich selvaht doon, un aw's end funn selli es eena nohch gayn un iahra vadda recht haysa. (Sela)

¹⁴Grawt vi shohf, iahra dayl is es grawb, da doht is iahra shohf-heedah. Di ufrichticha zayla ivvah si roola meiya-free, un iahra leib zayld kshvind fazeahra im grawb un datt missa si bleiva, veit vekk funn iahra deiyahri haymeda.

¹⁵Avvah Gott kawft mei sayl frei funn di gvald fumm grawb, fa eah nemd mich zu sich selvaht. (Sela)

¹⁶Feichet eich nett vann en mann reich vatt, un vann di hallichkeit funn seim haus graysah vatt.

¹⁷Fa vann eah shtaubt, nemd eah nix mitt sich, un sei reichheit kumd eem nett nohch.

¹⁸Even vann eah sich froit fa sei goot layva do, un leit preisa een vann eah goot dutt fa sich selvaht,

¹⁹doch zayld eah sei foah-feddah nohch gay, un si sayna's licht nee nimmi.

²⁰Da mann mitt grohsi eah kann nett do bleiva, eah kumd um grawt vi's fee aw dutt.