Read Pennsylvania German Psalm 50 Bible Online

Psalm 50 - Pennsylvania German bible

Psalm 50

¹En Psalm fumm Asaph. Da Awlmechtich Gott, da HAH, shvetzt, un rooft di eaht, fumm blatz es di sunn ufkumd, biss an da blatz es si unnah gayt.

²Gott sei hallichkeit sheind raus aus Zion, di shtatt es drivvah-naus shay is.

³Unsah Gott kumd, un eah is nett shtill; feiyah es frest gayt fannich eem heah, un en grohsah shtoahm is um een rumm.

⁴Eah rooft zu di himla ovvich uns, un zu di eaht, so es eah sei leit richta kann.

⁵Eah sawkt, “Geddahret zu miah mei heilichi, selli es en bund gmacht henn mitt miah deich en opfah.”

⁶Di himla sawwa veyyich sei gerechtichkeit, fa Gott selvaht is da richtah. (Sela)

⁷“Heichet mich ab, mei leit, un losset mich shvetza, oh Israel, ich zeik geyyich dich, ich binn Gott, dei Gott.

⁸Ich zank dich nett fa dei opfahra, un dei brand-opfahra sinn immah fannich miah.

⁹Ich habb kenn noht fa en bull funn dei sheiyah, adda fa gays funn dei shtall.

¹⁰Fa alli diah im bush is mei, un aw's fee uf dausends funn hivla.

¹¹Ich kenn alli fokkel uf di berga, un alles es sich faraykt in di feldah is mei.

¹²Vann ich hungahrich veah, dayt ich diah's nett sawwa, fa di veld is mei, un alles es drinn is.

¹³Maynsht du es ich's flaysh funn bulla essa vill, adda's bloot drinka funn gays-bekk?

¹⁴Opfah zu Gott en dank-opfah, un gebb zumm Alli-Haychshta vass du fashprocha hosht.

¹⁵Roof zu miah vann druvvel kumd, ich mach dich frei, un du zaylsht mich fagleahra.”

¹⁶Avvah zu di gottlohsa, sawkt Gott, “Vass fa en recht hosht du fa mei gebodda ausshprecha, adda fa mei bund in dei maul du?

¹⁷Fa du hasht vass ich diah sawk fa du, un shmeisht mei vadda hinnich dich.

¹⁸Vann du en deeb saynsht, dann lawfsht du mitt eem, du haldsht dich uf mitt aybrechah.

¹⁹Du losht dei maul evili sacha shvetza, un dei zung dreibt falshheit.

²⁰Du hoksht un shvetsht geyyich dei broodah, un du shtroisht kshvetzah veyyich dei maemm iahra boo.

²¹Du hosht dee sacha gedu un ich habb nix ksawt; du hosht gmaynd ich binn grawt vi du. Avvah nau setz ich dich recht, un layk's aus grawt fannich dei awwa.

²²Nau meik dess, du es Gott fagesht, eb ich dich in shtikkah fareis, un's is nimmand fa's fahalda:

²³Sellah es dank uf opfaht, sellah dutt mich recht eahra, un sellah es ohhald da recht vayk lawfa, een loss ich di saylichkeit funn Gott sayna.”