Read Pennsylvania German Psalm 51 Bible Online

Psalm 51 - Pennsylvania German bible

Psalm 51

¹Zumm foah-singah. En Psalm fumm Dawfit vo da brofayt Nathan zu eem kumma is noch demm es eah zu di Bathsheba ganga voah. Sei gnaydich zu miah, oh Gott, noch dei shtandhaftichi-leevi; reib mei sinda aus noch dei grohsi bamhatzichkeit.

²Vesh mich funn awl mei shulda, un mach mich sauvah funn mei sind.

³Fa ich kenn awl mei shulda, un mei sinda sinn immah fannich miah.

⁴Geyyich dich, un dich laynich, habb ich ksindicht, un habb evil gedu fannich dei awwa; so bisht du recht vann du shvetsht, un bisht unshuldich vann du richsht.

⁵Ich voah sindlich geboahra, un voah sindlich vo ich ohkfanga voah in mei muddah iahra leib.

⁶Yah, du vitt voahheit havva innahlich in miah, un lansht mich deef in meim hatz fa veisheit havva.

⁷Mach mich sauvah mitt hyssop, un ich va rein, vesh mich, un ich va veisah es shnay.

⁸Loss mich frayt un freyyaheit heahra, loss di gnocha es du fabrocha hosht sich froiya.

⁹Fashtekkel dei ksicht funn mei sinda, un reib awl mei shulda aus.

¹⁰Shaff in miah en rein hatz, oh Gott, un mach en neiyah un en gerechtah geisht in miah.

¹¹Shtohs mich nett vekk funn diah, un nemm dei Heilichah Geisht nett vekk funn miah.

¹²Bring di frayt funn dei saylichkeit zrikk zu miah, un hayb mich uf mitt en geisht es villing is.

¹³No lann ich di ivvah-dreddah dei vayya, un sindah zayla sich bekeahra zu diah.

¹⁴Hald mich funn bloot-shuldich sei, oh Gott, du, da Gott es mich saylich machsht, un mei zung zayld singa funn dei gerechtichkeit.

¹⁵Oh Hah, mach mei leftz uf, so es mei maul dei lohb fakindicha kann.

¹⁶Du bisht nett froh mitt en opfah, adda dann dayt ich diah's bringa; brand-opfahra kfalla diah nett.

¹⁷Di opfahra es Gott kfellich sinn, sinn en gebrochanah geisht; en gebrocha un en daymeedich hatz, oh Gott, dusht du nett fa'achta.

¹⁸Deich dei gnawt du goot zu Zion; bau di mavvahra funn Jerusalem uf.

¹⁹No vadda di gerechta opfahra diah kfellich, di brand-opfahra un gansi brand-opfahra. No vadda yungi bulla gopfaht uf deim awldah.