Read Pennsylvania German Psalm 56 Bible Online

Psalm 56 - Pennsylvania German bible

Psalm 56

¹Zumm foah-singah. Fa's leet, “Di Daub Unnich Di Fremda.” En Psalm fumm Dawfit vo di Philishtah een gnumma henn in Gath. Sei miah gnaydich, oh Gott, fa mennah shtamba uf mich; si dredda uf mich da gans dawk lang.

²Mei feinda lawfa uf mich di gans zeit; un feel fechta geyyich mich, oh du Alli-Haychshtah.

³Vann ich mich feich, dann doon ich mei fadrauwa in dich.

⁴Ich zayl Gott sei vatt preisa; ich du mei fadrauwa in Gott, un feich mich nett. Vass kann da mensh du zu miah?

⁵Da gans dawk lang fadrayya si mei vadda; un iahra gedanka sinn yusht fa miah evil du.

⁶Si fasamla sich zammah un voahra; si vatsha mei shridda, un vella mei layva nemma.

⁷Shtrohf si in iahra ungerechtichkeit; in dei zann, oh Gott, bring selli leit nunnah.

⁸Di dawwa in meim aylend hosht du gezayld; mei awwa-vassah hosht du ksammeld in en boddel. Is es nett nunnah kshrivva in dei buch?

⁹No drayya mei feinda zrikk, vann ich roof fa hilf. Ich vays dess, es du mei Gott bisht.

¹⁰Ich zayl Gottes Vatt preisa; ich zayl em HAH sei Vatt preisa.

¹¹Ich du mei fadrauwa in Gott, un zayl mich nett feicha. Vass kann da mensh du zu miah?

¹²Vass ich fashprocha habb, muss ich du, oh Gott; ich zayl dank-opfahra gevva zu diah.

¹³Fa du hosht mei sayl aus di kfoah fumm doht kalda, un mei fees kalda funn shtolbahra, so es ich fannich Gott lawfa kann, im licht funn layva.