Read Pennsylvania German Psalm 58 Bible Online

Psalm 58 - Pennsylvania German bible

Psalm 58

¹Zumm foah-singah. Fa ksunga sei zu di veis, “Fadeahb nett.” En Psalm fumm Dawfit. Shvetzet diah vass recht is in di voahheit, diah mechtichi? Richtet diah di mensha in gerechtichkeit?

²Nay, in eiyah hatza shaffet diah ungerechtichkeit; uf di eaht doon eiyah hend evil shaffa mitt gvald.

³Di gottlohsa gayn letz fumm dawk es si geboahra sinn; funn muddahs-leib gayn si letz un sawwa leeya.

⁴Si sinn foll gift vi en giftichi shlang; si shtobba iahra oahra zu, vi en dawbi kohbra-shlang,

⁵so es see di shtimm fumm shlanga-mann nett heaht, deah vo goot droh is am en shpell uf see du.

⁶Oh Gott, fabrech di zay in di yunga layb iahra meilah; reis di fang-zay aus iahra meilah, oh HAH!

⁷Loss si fagay vi vassah es ab lawft; vann si iahra arrows zeela, loss si fabrocha sei.

⁸Loss si sei vi en shnekk es fagayt in iahra shleim, vi en shtill-geboahra kind es di sunn nee nett saynd.

⁹Eb eiyah kesla di hitz fumm danna-feiyah feela, eb di danna gree adda drukka sinn, dann keaht eah di ungettlicha vekk.

¹⁰Di gerechta zayla froh sei vann si sindah sayna kshtrohft vadda, si zayla iahra fees vesha im bloot funn di gottlohsa.

¹¹Di leit zayla sawwa, “Yau, di gerechta greeya iahra lohn; yau, es is en Gott es di eaht richt!”